1. 1. 2019: В Камюнці припомянули русиньскы рождественны звыкы

29. грудня/децембра 2018 р., в селї Камюнка, Старолюбовнянського окресу, одбыла ся подія, в рамках котрой припоминаны були святочны традициі і звыкы Камюнчан та Русинів із другых сел реґіону. Подія мала назву «Дни русиньскых звыків і традиций села Камюнка».

«Дни русиньскых звыків і традиций села Камюнка» зачали о год. 16.30 різдвяным молебном в місцевій церкви св. верховных апостолів Петра і Павла, настоятельом якой є русиньскій священник Франтішек Крайняк (на фотцї). По богослужыню в храмі вызвучал концерт русиньскых коляд.

Од 18.00 год. в Культурным Домі было одкрытя выставы присвяченой Камюнці, яка перемогла в плебісциті на найліпше село Словациі. В 2017 роцї Камюнчане одобрали оцініня телевізийного плебісциту Най селечко Словациі (Naj dedinka Slovenska). 

По выставі почал ґальовий концерт «Христос Раждаєт ся», в котрым презентуваны были м.ін. русиньскы коляды і різдвяны обряды. Орґанізаторе запросили фольклорны ансамблі зо Словаиці і Украіны. Выступлят колективы Шумячан, Сестры Угляровы, Рутенія, Вородай та домашні ґрупы Барвінок, Барвінок-Сеньоры і Барвіночок. З Підкарпать прикрашати святочний час пришол ансамбль Руснакы.

Стріча є орґанізувана м.ін. при спілпрацы села Камюнка, Любовяньского Освітнього Oсередка, Русиньской Оброды на Словациі, Общества св. Йоана Крестителя та орґанізациі молоды.Русины.Теперішній председа РОС – Мартін Караш, жыє в Камюнці і окрем роботы в рамках веденой ним орґанізациі є тіж ведучым ансамблю Барвінок.

Севериян КОСОВСКЫЙ, Лем.фм

(Публікуєме в оріґіналї – лемківскім варіантї русиньского языка.)

Script logo