1. 6. 2016: В недїлю 5. юна 2016 одкрыють лїтню школу
В недїлю 5-го юна 2016 р. ся святочно одкрыє вже 7-ый річник Studium Carpato-Ruthenorum. Міджінародна літня школа русиньского языка і културы Studium Carpato-Ruthenorum 2016 офіціално одкрыє ся о 17.00 год. в пряшівскім пензіонї „Átrium‟ святочнов рецепціов із културным проґрамом, котра буде одкрыта про верейность, і в рамках котрой буде выступати Анна Сервіцька з музичнов ґрупов Дрібна.
Єдина у світї
Міджінародна лїтня школа русиньского языка і културы Studium Carpato-Ruthenorum 2016 є орґанізована Інштітутом русиньского языка і културы Пряшівской універзіты. Пряшівска універзіта в Пряшові є єдинов універзітов у Словацькій републіцї, котра реалізує навчаня акредітованого бакаларьского, маґістерьского і докторьского штудійного проґраму русиньскый язык і література, ґестором котрого є Інштітут русиньского языка і културы. Вдяка ёго 3-тыжднёвому едукачному проєкту Studium Carpato-Ruthenorum – Міджінародна лїтня школа русиньского языка і културы Пряшівска універзіта є сучасно єдинов універзітов на світї, котра зареаґовала на інтерес o таку форму навчаня русиньского языка з боку домашнїх і загранічных адептів.
Лекторы зо Словакії і заграніча
Міджінародна лїтня школа русиньского языка і културы Studium Carpato-Ruthenorum 2016 буде мати як все лекторів зо Словакії і зо заграніча.
Курз історії карпатьскых Русинів будуть вести проф. Др. Павел Роберт Маґочій, (Торонтьска універзіта, Канада) і Мґр. Валерій Падяк, к. н., (Научный центер карпатістікы в Ужгородї, Україна).
Курз русиньского языка тот рік поведуть Асіст. проф. Др. Елена Будовская, (Джорджтавньска штатна універзіта, Вошінґтон, D. С., США), ПгДр. Кветослава Копорова, ПгД. (Пряшівска універзіта, Словакія), Мґр. Марек Ґай, екстерный сполупрацовник Інштітуту русиньского языка і културы Пряшівской універзіты, Словакія.
Мінікурз русиньской етноґрафії буде проходити під веджінём Асіст. проф. Др. Елены Будовской, і проф. ПгДр. Миколы Мушинкы, др. н., екстерного сполупрацовника Інштітуту русиньского языка і културы Пряшівской універзіты.
Події про верейность
Вже традічно почас лїтнёй школы проходять і події, котры суть одкрыты про верейность. Окрем святочного одкрытя школы, будуть і далшы три події, котры на котрых може брати участь шырока публіка.
У віторок 14-го юна 2016-го року в Словацькім народнім музею – Музею русиньской културы в Пряшові буде од 17.30 год. проходити презентація русиньско-анґліцькой приповідковой книжкы Михайла Гиряка В сімдесятій семій країнї. О книжцїі ся веце можете дізнати в нашій статї на інтернетовій адресї:
23-го юна можете іти на Літературный вечур під назвов Смутный клавн, віршы і ґітары, або русиньска поезія дакус іншак, котрый зачінать о 19.00 год. на Великій сценї Театру Александра Духновіча в Пряшові. В проґрамі зазвучать віршы русиньскых авторів Штефана Сухого, Юрка Харитуна, Валерія Купкы, Владіслава Сивого, Кветы Мороховічовой-Цвик і Даніелы Капралёвой. О музику і спів ся постарать Владіслав Сивый і Томаш Сивый. Декламовати будуть акторы Театру Александра Духновіча в Пряшові Іґор Латта, Людмила Козменкова, Зузана Ковалчікова, Ладіслав Ладомиряк. Сценарь і режію приготовила Яна Трущіньска-Сива.
Про верейность буде одкрыте о святочне передаваня цертіфікатів о абсолованю лїтнёй школы повязане із офіціалным закінчінём школы. Тото одбуде ся о день пізнїше, 24-го юна, в пензіонї „Átrium‟ од 18.00 год. І на тот вечур є приготовленый і културный проґрам.
Петро МЕДВІДЬ
