1. 6. 2025: В сканзенї в Бардеёвскый Купелях почала велика реконштруцкія

Шарішскый музей в Бардеёві, котрого зряджователём є Пряшівскый самосправный край (ПСК), почав реконштрукцію свого сканзену в Бардеёвскых Купелях. Інформовало о тім Оддїлїня комунікації ПСК.

Проєкт під назвов Музей – мій часопростор реалізує музей із польскым партнером, котрым є Музей ремесел в Короснї, в рамках проґраму Interreg Польща – Словакія 2021-2027 із бюджетом майже 4 міліоны евр. На словацькый бік граніцї іде 1,9 міліона евр, найвызначнїшу часть інвестіцій притім творять еврофонды, котры суть доповнены державныма фінанціями, а так само грошами з розрахунку ПСК.

„Цїлём европроєкту є заховати културну дїдовизну, укрїпити роль културы і утримательного турістічного руху в господарьскім розвитку, соціалній інклузії і соціалных іноваціях в польско-словацькім пригранічу, а в непосліднїм шорї підняти атрактівность Шарішского музея,“ інформовала пряшівска жупа.

Проєкт в сканзенї є заміряный на ставебно-технічну обнову обєктів, котры ся в нїм находять. В Бардеёвскых Купелях ся буде робити на 20-ох обєктах – семох хыжах, двох деревяных храмах, двох сыпанцях і дзвоніцях, ковальскій шмыкнї і далшых. Реконштрукціёв перейде і гоблярьска майстерня, в котрій выникне новый выставно-едукачно-презентачный простор.

Закінчіня проєкту Музей – мій часопростор є наплановане на юн 2026-го року. Почас робот буде сканзен одкрытый, обмеджена буде часткового лем тота часть, в котрый актуално буде проходити реконштрукція.

Сканзен в Бардеёвскых Купелях, котрый тот рік святкує 60 років од одкрытя, є єднов із найстаршых експозіцій народной архітектуры на Словакії. На 1,6 гектара є 31 експозічных обєктів, переважно із 19-го і 20-го столїтя, котры презентують народну културу і будованя словацького і русиньского населїня в реґіоні Вышнёго Шаріша і Северного Земпліна.

Петро МЕДВІДЬ, ЛЕМ.фм, языкова і ґрафічна управа: АРК СР.