1. 7. 2025: Презідент Пеллеґріні стрїтив ся із представителями меншын
Розмаїтость посилнює Словацьку републіку, і народностны комуніты бы в країні мали жыти в мірї і сінерґії. Повів то на пресконференції презідент Словацькой републікы Петер Пеллеґріні.
Тота одбыла ся по скінчіню округлого стола з представителями народностных меншын, якый проходив у понедїлёк, 30-го юна 2025-го року, в Презідентьскім палаці. Інформовала о тім аґентура TASR.
За окремы меншыны были участны по єднім членови Рады влады СР про народностны меншыны, за русиньску меншыну взяв участь Мартін Караш (на фотцї першый справа), котрый є і председом Русиньской оброды на Словеньску.
Презідент апеловав, жебы народностна приналежность не была причінов на звады або поларізацію. Підкреслив, же обчане СР суть і тоты, котры мають іншу народность.
Народностный закон є вызва
„Не довольме переносити великы конфлікты із заграніча меджі нашы народностны комуніты, котры ту жыють, без огладу на то, што ся дїє ся довкола у світї, в мірї, покою, і хотять так фунґовати і далше,“ повів Пеллеґріні. Кликав за тым, жебы конфлікты не односили ся до людей, котры з нима нич не мають довєдна.
„То люде, котры жыють на Словакії, котры ту штудують, выховують свої дїти, честно роблять або пережывають уж заслужену старость,“ доповнив.
Голова державы звернув увагу на проблемы, із котрыма люде іншой народности на Словакії стрїчають ся. Вызвав зато злїпшыти процесы. Пеллеґріні авізовав, же слїдуючій тыждень має стрїтити ся із міністерков културы Мартінов Шімковічовов. Хоче їй тлумачіти і пропозіції ку зефектівніню Фонду на підпору културы народностных меншыны.
„Жебы вшыткы тоты, котры орґанізують прекрасны фестівалы або акції, выдають публікації і орґанізують різны проєкты, дістали ся ку грошам омного скоріше,“ повів Пеллеґріні.
За вызву означів і приправу нового Закона о поставлїню народностных меншын. Обернув увагу на то, же меншыны довго тот закон жадають. Предметом діскусії мусить подля нёго стати і Закон о хоснованю языків народностных меншын, а Закон о державнім языку. Апеловав на вшыткых, котры будуть творити або управлёвати леґіслатіву, яка дотулять ся народностных меншын, жебы до процесу залучіли і представителїв меншын.
Рїшыти треба і міґрантів
Презідент думать, же треба рїшыти і сітуацію міґрантів. Вказав на то, же представителї народностных комуніт, котры жыють на Словакії цїлы десяткы років, суть залучены до общества, але тоты новы все стрїчають ся з барьєрами. Бісїдовав о довгім тырваню адміністратівного процесу ці о здобытю терміну на амбасадах ку злучіню родины. Авізовав, же о тім буде бісїдовати з Міністерством загранічных дїл СР. Стрїчу зорґанізовав радник презідента про народностны меншыны Крістіан Форро. На округлім столї окрім представителїв меншын взяли участь і уповномочена влады про розвиток обчанской сполочности Сімона Захарова, уповномоченый влады про народностны меншыны Акош Горонь, а уповномоченый влады про ромскы комуніты Александер Дашко.
Петро МЕДВІДЬ, ЛЕМ.фм, языкова і ґрафічна управа: АРК СР.
