1. 9. 2025: Проґрам Театру Александра Духновіча в Пряшові на місяць септембер 2025
17-го септембра 2025
Щастна выгра (Велика сцена, 19.00 год.)
Шалена комедія із сучасности о небезпечнї силній тузї за лїпшым жывотом. За щастём і грошами. Нова історія манжельской пары Надежды і Бориса (познатых із комедії Детектор лжи), котры знова пережыють невіроятный вечур у своїм обычайнім панелаковім квартелю. Бо Надежді і Борисови сповнив ся сон: выграли астрономічну фінанчну суму в лотерії. Конечно суть богаты! Конечно перервуть рабскы ланцы, котры звязують їх нудны жывоты. Конечно Всевышнїй выслухав молитвы Надежды, і послав їм выгру, котру нихто не чекав. Святкованя выгры тырвало цїлу нїч. Але рано ся солодкый сон мінить на кошмар. Выгерный тікет пропав. Просто счезнув. Або го якыйсь завистник вкрав?
18-го септембра 2025
Фараоны (Велика сцена, 19.00 год.)
Фунґованя колхозу, в котрім панують класічны стереотіпы о дїлїню роботы на хлопску і женьску, нарушыть єдного рана вість і вычеряню позіцій. Там, де стояли хлопи, будуть жены і наопак. Што ся стане, кедь хлопи-функціонарї, нараз будуть женами, котры ся старають о обыстя? Комедія Фараоны приносить гуморну і выдарену моделову сітуацію на тему перевернутя сполоченьскых роль.
23-го септембра 2025
Руковины на Гончарівці (Велика сцена, 19.00 год.)
Oдарка цїлый час вадить ся із своїм мужом, бо Прокіп пє. Кедь їм запропонують оддати свою дївку Уляну за дурного Стецька, згодны суть, бо тот є холем богатый. Але сердце Уляны вже давно здобыв собі бідный Олексій. Руковины ближать ся, но як ся бісїдує, сердцю не розкажеш. Што выдумать залюблена пара, жебы планы родічів не зопсули їх щастя? Пєса україньского прозаіка і драматурґа Григорія Квіткы-Основяненка днесь належыть меджі класіку. На першый погляд легка комедія о любви одкрывать важны вопросы о рівности людей, о родинных односинах, але і о значіню простого людьского щастя.
24-го септембра 2025
Мерькуйте на Флорес (Велика сцена, 19.00 год.)
Як часто ся жена чує быти женов? Од чого залежыть чувство щастной і чарівной левітації? Твор Ніла Саймона занимать ся тыма в сучасности найважнїшыма вопросами. Тадь выважене взаємне дїяня сил їн і ян у козмосї є резултатом складной роботы над собов, над своёв особностёв, над своїм жывотом. І намагати мають ся так жены, як і хлопи, бо танґо танцюють у парї. Головна геройка знайде ся осамочена із своїм середнїм „неліквідным“ віком і своїма свіжыма болїстныма розходами. Здає ся, же жывот ся заставив, і вшыткы выроблены схемы комфортного єствованя згорїли в поломінях обставин. Могла бы ся зломити і зненавидїти свою судьбу. Лемже… судьба дарує женї три шалены приятелькы і двох горячіх іспаньскых любителїв жывота. Як скінчіть тота iнтересна комедія і ці научіть ся Флорес чути ся щастливым і чарівным квіточком, дізнаме ся по посмотрїню пєсы. Тото представлїня є скапчанём прекрасного гумору, невычерьпной мудрости бытя а любви до жывота і до себе.
Выступліня ТАД мімо Пряшів
5-го септембра 2025
Руковины на Гончарівці (Културный дім Руськый Потік, 18.00 год.)
7-го септембра 2025
Руковины на Гончарівці (Културный дім Нижня Ядлова, 15.00 год.)
12-го септембра 2025
Руковины на Гончарівці (Културный дім Цернина, 18.00 год.)
13-го септембра 2025
Щастна выгра (Културный дім Габура, 18.00 год.)
14-го септембра 2025
Фараоны (Културный дім Ряшів, 16.00 год.)
20-го септембра 2025
Головный тарабанщік (Културный дім Вальківцї, 18.00 год.)
Пєсу Головный тарабанщік Александер Духновіч написав у 1852-ім роцї, но темы, котры в нїй одкрывать, суть веце як актуалны. Тадь припады здобыти функцію ці тітул не найчестнїшыма способами видиме і днесь. Любов двох молодых людей все належыть до тых найчістїшых чувств. Почливость до родічів є моралным імператівом. А рівноправность каждого чоловіка, каждого народа, доднесь не є вырїшеным, закінченым дїлом.
21-го септембра 2025
Руковины на Гончарівці (Културный дім Гостовіці, 16.00 год.)
27-го септембра 2025
Руковины на Гончарівці (Културный дім Выкроп, 17.00 год.)
28-го септембра 2025
На ревізію (Културный дім Литманова, 16.00 год.)
Остра сатірічна комедія о жывотї і роботї сільского старосты і о тім, як рїшыв проблемы сільскых людей. В пєсї найдете достаток гумору і музикы, як і выпитой водкы і глубокого значіня. Пєса є приступна молодежи од 16 років.
Петро МЕДВІДЬ, ЛЕМ.фм, языкова і ґрафічна управа: АРК СР.
