10. 10. 2025: Вышла далша книжка Елены Хомовой-Грінёвой, котру выдала Академія русиньской културы в СР

Елена ХОМОВА-ГРІНЁВА народила ся 2. 3. 1958 в Удолю, жыє і творить в Старій Любовнї, теперь выдає 7. свою книжку в русиньскім языку.

Хоць Елена Хомова-Грінёва зачала выдавати книжкы в русиньскім языку лем од 2020 року, але реґуларно брала участь в Літературнім конкурзї Марії Мальцовской а по оцїнїню в тім конкурзї чітателї з єй поезіёв реґуларно стрїчають ся нелем на сторінках часописів, але уж і в книжных публікаціях. Авторка выдала зборникы поезія такы як Уяцькыма пішниками (2020), Під скалов росте свербогуза (2021), Дякуєме ті, Боже (2022), Высоко небо / Vŷsoko nebo (2023), Любов сердця / Ľubov serdcʼa /  і Научайте, мамочкы, по своёму дїточкы / Naučajte, mamočkŷ, po svojomu dʼitočkŷ (обидві 2024).

Хомова теперь приносить чітателям русиньской лїтературы новый зборник поезії під назвов Світаня / Svitaňa, котрый нескривано і ясно говорить, же у стихах домінує вічный мотів любови партнерів, меджі людьми і к природї. Хомова так найновшов публікаціёв у рамках сучасной русиньской лїтературы на Словакії занимать місце попри такых поетів як Квета Мороховічова Цвик і Юрко Харитун. Але она, на роздїл од спомянутых, зосерджує ся главно на любов меджі мужом і женов, лейт мотів любови в зборнику ся презентує в різных подобах, фазах і проявах. 

Композіція стихів є проста, у віршах владнуть описны метафоры і главно прирівнаня. Авторка нераз приподобнює любов партнерів к різным жівелным природным явам. Головнов думков зборника є, же любов представлять ідеал і змысел жывота, по котрім чоловік неперестанно прагне, даколи але по снажінях і жертвах і так зажывать терьпке розчарованя. В такых припадах але авторка нераз припоминать все потенціалну надїю на нове взаємне одношіня, котре приносить щастя на цїлый жывот.

З рецензії Мґр. Михала Павліча, ПгД.