10. 11. 2019: 120 років од народжіня Івана Сливкы

Іван Сливка (John Slivka) нар. ся 12. 11. 1899 у Джесопі, штат Пенсілванія, США, умер 1. 11. 1986 у Бруклінї, штат Ню Йорк, США. Быв священиком і історіком русиньского походжіня в США.

І. Сливка належав до невеликой ґрупы семінарістів, народженых в Америцї, котры ся учіли в Ужгородьскій ґрекокатолицькій богословскій семінарії скоро по Першій світовій войнї. По закінчіню штудій вернув ся домів  і став єдным із послїднїх женатых священиків, хто дістав рукоположіня (1926) в Америцькій ґрекокатолицькій (візатійскій) руській церькви в США. І Сливка быв пересвідченым застанцём выходного обряду і іншых русиньскых реліґійных і світьскых традіцій. Дотримуючі ся погляду на Русинів як окрему народность, він у дакількох научно-популарных роботах, в тім чіслї у „Who Are We?‟ (1977) пропоновав, жебы назва „Русин‟ (Rusin) служыла як назва народности а термін „ґрекокатолицька‟ намісто терміну „візантійска‟, про  назву церькви. Знепокоєный зростаючов словакізаціёв русиньского населїня в северовыдній Словакії, він ся ку тому проблему высловив у роботї „History of the Greek Rіte Catolics in Pannonia, Hungary, Czechoslovakia, and Podkarpatska Rus´, 863 – 1949“ (1974). I. Сливка приправив тыж короткы русиньско-анґліцькый і анґліцько-русиньскый словникы (1963, 1973), а тыж зборникы документів о історії америцькых Русинів – „Historicala Mitrror: Sources of the Rusin and Hungarian Grek Rite Catolics in the United States of America, 1884 – 1963) (1978). Богату бібліотеку і архів І. Сливкы было по ёго смерти передано Музею-інштітуту дїдовизны Пасасаїцькой візантійской католицькой єпархії.

Павел Роберт МАҐОЧІЙ, здрой: „Енциклопедія історії та культури карпатських русинів‟ зоставителїв П. Р. Маґочія і І. Попа. Ужгород: „Видавництво В. Падяка‟, 2010, с. 692-693, переклад: А. З.