10. 2. 2026: Першый по русинькы граный філм Потопа має девять номінацій в Словацькій філмовій і телевізній академії

Словацька філмова і телевізна академія 5. фебруара 2026 публіковала номінації на народны філмовы премії Slnko v sieti (Сонце в сітї) за 2025 рік. Радує нас, же меджі номінованыма є і першый по русиньскы граный філм Потопа, котрый є в кінах од децембра минувшого року i якый є спомином на выстягованя 7 русиньскых сел одностно побудованя Стариньской гатї. Потопа здобыла довєдна аж девять номінацій в різных катеґорія філмовой премії.

Як Словацька філмова і телевізна академія інформовала, за 2025 рік приголошеных было 38 авдіовізуалных творів, із того до катеґорії Найлїпшый граный філм было приголошеных 15 філмів. А успішным в номінаціях є і філм Потопа, што ясно говорить о тім, же філм є позітівно приятый нелем русиньсков публіков, но заінтересовав ай філмову крітіку і Словацьку філмову і телевізну академію. В катеґофії Найлїпшый граный філм є за філм Потопа номінованый режісер Мартін Ґонда і продуценты Катарина Кырначова, Томаш Ґіч і Віктор Шварц. В катеґорії Найлїпша філмова режія має за Потопу номінацію Мартін Ґонда. Номінованы суть і акторы. Сара Хрипакова має номінацію в катеґорії Найлїпшый женьскый акторьскый выкон в головній ролї. Володимір Чема здобыв номінацію в катеґорії Найлїпшый мужскый акторьскый выкон в другорядній ролї.

-р-