10. 4. 2020: Юрко ХАРИТУН: Не майте страх, Дорога до порога, Богатство (Стишкы)

Юрко ХАРИТУН
НЕ МАЙТЕ СТРАХ

На сердцю
отварям дверцї
Летьте, віршикы мої
лїпше вам буде меджі людьми
В моїй душі
може вам тїсно
коли видите лїтати голубів
Не майте ани страх з орлів
одлетять коли учують ваш спів

ДОРОГА ДО ПОРОГА

Цїлу ніч по стрїсї
бубновали доджі
І громы били
як молотками ковалї
як копытами гачуры
Гучали потічкы
стїкаючі до рікы
Перед нами преграда-гать
без човна і весел не можу
вернути ся назад?
Лїсами пішник не видно
і ногы болять
Боже, за Пеґаса дякую тобі
Сиджу на порозї під стрїхов
Так добрї менї

БОГАТСТВО

Тот богатый
хто сердце має
і хоче любов роздавати
Може і босый ходити
і кешенї порожнї мати
буде бoгатый


(З приправлёваной книжкы Наш край – наш рай.)

Script logo