10. 4. 2025: Потятка, сироты і Вівіенн. Першу персоналну выставу Вівіенн Варґовой рихтують в Празї

На своїй першій персоналній выставі Вівіенн Варґова представить творчость техніками колажи і акрілового монопрінта за послїднїй рік. Є фотоґрафков – самоуком, котра є захоплена алтернатівныма фотоґрафічныма процесами, якы їй припоминають алхімію. Окрему залюбу має в комбінованых техніках. Хоснує фотоґрафії з книг і часописів, а так само робить з властныма ґрафіками і фотоґрафіями – деконштруує їх, і пак їх реконштруує за помочі фарбы як візуалной стратеґії на створїня цїлого сонного образу.

Централным мотівом є баданя переміны і поминутельности, ці у фізічных просторах або в періодах жытя. Творить медітатівны творы, котры бісїдують о універзалній скушености гляданя, де творчость є рітуалом домова, де бы сьте лем не были.

„Думам, же аналоґова техніка має своє чаро, бо каждый твор є унікатный і не дає ся репродуковати цалком єднако. Хочу мати брудны рукы, брудный стіл, чути тото, што творю, вшыткыма змыслами,“ говорить вытварнічка.

Вернісаж выставы Потятка, сироты і Вівіенн одбуде ся 1-го мая 2025-го року, і в Домі народностных меншын в Празі буде мож єй відїти до 15-го мая.

Петро МЕДВІДЬ, ЛЕМ.фм, языкова і ґрафічна управа: АРК СР.