10. 4. 2026: Філм Потопа здобыв найвеце словацькых філмовых премій Slnko v sieti

9-го апріля 2026-го року одбыло ся святочне передаваня словацькых народных філмовых премій Slnko v sieti 2025. На Slnko v sieti мав девять номінацій і першый по русиньскы граный філм Потопа, котрый быв у кінах од децембра 2025-го року. Потопа стала єднозначно найуспішнїшым філмом. Із девятёх номінацій наконець здобыла шість премій!! Філм Отець здобыв пять премій, Непела лем три.

Домініка Удворкова, Мартін Ґонда і Мартін Шустер здобыли за філм Потопа премію в катеґорії Найлїпшый філмовый сценарь. Богуміл Мартінак, Іван Дюркех, Квентін Колетт і Рено Ґійомен собі за Потопу однесли премію в катеґорії Найлїпшый філмовый звук. Юрай Кухарек здобыв Slnko v sieti за філм Потопа в катеґорії Найлїпша сценоґрафія. Сара Хрипакова (на фотцї), котра в Потопі грала головну геройку, здобыла премію в катеґорії Найлїпшый женьскый акторьскый выкон в головній ролї. Премію здобыв і Володимір Чема, а то в катеґорії Найлїпшый мужскый акторьскый выкон в другорядій ролї. Філм Потопа здобыв і Премію публікы Slnko v sieti. В тій катеґорії могли люди голосовати за свій найоблюбенішый філм 2025-го року, і найвеце голосів здобыла якраз Потопа.

Выбране і скорочене зо статї Мґр. Петра МЕДВІДЯ, ЛЕМ.фм. Ґрафічна і языкова управа: АРК в СР.