10. 5. 2019: Кружлёва честує павшых за слободу рекордным написом

Село Кружлёва, котре находить ся в окресї Свідник, має словацькый рекорд за найвекшый горізонталный напис в єкстерьєрї – Údolie smrti (Долина смерти). Інформовала о тім аґентура SITA.

Новый напис, котрый наіншталовали в місцяцї апріль 2019-го року, має быти поддля слов старосты села Кружлёва – Адріяна Ґужа, почестованём памяткы вшыткых павшых вояків і припомянутём собі тяжкых страт на жывотах і страшных боїв, котры на тых місцях пороходили почас Другой світовой войны.

 

Сполупраца Польща – Словакія

Напис быв наіншталованый на місцї, котре має єднаку назву – Долина смерти, і якраз ту одбыла ся найвекша танкова битва Карпато-дукляньской операції. Має розміры 998 х 290 центіметрів і має быти фотоґенічнов домінантов і турістічным тяглом.

Выникнув у рамках мікропроєкту Долина смерти – земля войновых героїв, котрый быв фінанцованый із Европского фонду реґіоналного розвитку. З проґраму Interreg V-A Польща Словакія 2014 – 2020 село на проєкт здобыло понад 49 600 евр. Із державного розрахунку Словакії ішло понад 5800 евр і співфінанцованя села было нецїлых 3000 евр.

Мікропроєкт реалізовав ся з участёв словацького і польского партнера – Ґміны Дукля, здружінь і орґанізацій, котры занимають ся розвитком, підпоров і пропаґаціёв той културной і природной дїдовизны реґіону під Дуклёв.

 

Збудовали алтанкы і інформачны табліцї

В рамках мікропроєкту было наіншталованя єкстерьєрового напису лем єднов частёв цїлой реалізації. Як інформовав староста Ґужо, выбудовали ся і два алтанкы, єден в селї Гавранець, другый в Кружлёвій. Алтанкы служать як сполоченьска і оддыхова зона.

Далшов актівностёв была іншталація інформачных табліць в каждім селї мікрореґіону, на котрых суть інформації о найвызначнїшых особностях, котры діяли на тій теріторії, і котры мали історічну роль при освободжованю теріторії почас Другой світовой войны. Надруковав ся і інформачный білтен о історічных і културных памятках в девятёх селах мікрореґіону Долина смерти.

 

Памятка на бої

Меджі селами Кружлёва, Капішова і Нижня Писана є в теренї розміщена танкова техніка, котра зображує танкову роту в атацї. Сімболізує єй вісем танків T-34/85, чім ся навщівникам припоминають танковы бої, котры в тім просторї проходили од 25-го до 27-го октобра 1944-го року. Долина, в котрій проходили найтяжшы бої, належыть до музею на Дуклї.

Петро МЕДВІДЬ, лем.фм

Script logo