10. 6. 2026: Studium Carpatho-Ruthenorum – Меджінародна лїтня школа русиньского языка і културы

Інштітут русиньского языка і културы Пряшівской універзіты в Пряшові 8. юна 2026 в універзітных просторах открыв 14. рочник Studium Carpatho-Ruthenorum – Меджінародну лїтню школу русиньского языка і културы.

Як із самой назвы проєкту видно, русиньскый язык і русиньска култура суть главныма областями, на якы є тот едукачный проєкт заміряный. Пряшівска універзіта є єдинов універзітов на світї, котра каждорoчно од року 2010 отварять дверї лїтнёй школы русиньского языка і културы про каждого, кого інтересує русиньскый язык, історія, етноґрафія і култура Русинів. Вдяка тому до Пряшова каждый рік приходять люде з розлічных країн світа.

Кедь порахуєме дотеперїшнїх абсолвентів лїтнёй школы, то выйде нам, же цертіфікат Studium Carpatho-Ruthenorum дотеперь здобыло коло 300 участників з Нїмецька, Австрії, Швейцарії, Україны, Польщі, Чеськой републікы, Булгарії, Сербії, Споєных штатів Америкы, Канады, Австралії, Білорусії, Арґентины, Чіны і  зо Словакії. А того року к ним прибудуть далшы.

Торжественный вечур русиньскыма співанками отворили „Столічного джывкы“, фолклорна ґрупа із Великого Липника (на фотцї). Як участників, так і гостїв привитала модераторка Мґр. арт. Ярослава Сисакова, Арт. Д. із перекладательков до анґліцького языка Мґр. Тімеов Верешовов, ПгД.

Участникам ся приговорив ректрор Пряшівской універзіты в Пряшові – Др. г. ц. проф. ПгДр. Петер Коня, ПгД. (на фотцї),  віцепріматор міста Пряшів – Мґр. Петро Крайняк, і за Інштітут русиньского языка і културы Пряшівской універзіты в Пряшові выступила Мґр. Зденка Цітрякова, ПгД. Представили ся і самы участникы і коротко розповіли о своїй мотівації взяти участь на лїтнїй школї і з якыма обчекованями пришли до Пряшова.

Успіх каждого проєкту залежить од многых факторів, но найвекшу роботу в тім процесї на себе бере Інштітут русиньского языка і културы. До штруктуры орґанізачного колектіву SCR – меджінародной лїтнёй школы русиньского языка і културы належать  Мґр. Тімея Верешова , ПгД. (на фотцї з ректоором ПУ), Мґр. Аліца Вєтошевова, Мґр. Зденка Цітрякова, ПгД., Мґр. Михал Павліч, ПгД.,  і Мґр. Домініка Новотна.

Орґанізачный і педаґоґічный колектів лїтнёй школы має меджінародный характер. Ёго членами суть люде розлічных народностей, якы суть обчанами розлічных штатів. Вшыткы ся але снажать цїлый рік ефектівно сполупрацовати, жебы каждый новый рочник проєкту быв лїпшый і жебы ословив якнайвеце участників. Вдяка пропаґачній роботї сполуорґанізаторів, членів і актівістів русиньскых орґанізацій в Америцї, такых як професор Павел Роберт Маґочій, Марія Сілвестрі, Патріція Крафчік, вдяка сполупраці Карпаторусиньского общества (Carpatho-Rusyn Society) в Піттсбурґу, надації ТІМО або Карпаторусиньского научного центрав США і їх штіпендійній підпорї, каждый рік з Америкы приходять на лїтню школу новы штуденты. Таксамо є тот рочник реалізованый з фінанчнов підпоров Фонду на підпору културы народностных меншын.

Навчаня того року буде вести довєдна вісем учітелїв:

  • Предмет русиньскый язык по русиньскы буде учіти: ПгДр. Кветослава Копорова,ПгД., універзітна доцентка з Інштітуту русиньского языка і културы Пряшівской універзіты,
  • Русиньскый язык по анґліцькы буде учіти Др. Натан Маркс з Оклагомской універзіты,
  • Історію карпатьскых Русинів в русиньскім языку буде учіти доц.  ПгДр. Володимир Фенич, к. н. з Ужгородьской народной універзіты,
  • Історію карпатьскых Русинів в анґліцькім языку буде учіти Мґр. Томаш Калинич, докторанд на Карловій універзітї в Празї,
  • Етноґрафію карпатьскых Русинів у русиньскім языку буде учіти Мґр. Тімотей Федор, етноґраф СНМ – Музея русиньской културы в Пряшові,
  • Етноґрафію карпатьскых Русинів в анґліцькім языку буде учіти ПгДр. Катарина Бабчакова з Народного освітового центра на Словеньску,
  • Курз русиньской літературы в анґліцькім языку, яке буде вести Ассоц. Проф. Др. Нік Купеньскый із Академії авіачных сил США,
  • а в русиньскім языку літературу буде вести доц. Мґр. Валерій Падяк, к. н.  з Інштітуту русиньского языка і културы ПУ.

Жычіме вшыткым участникам, педаґоґам і орґанізачному тіму велё силы і няй ся ім 14. рочник Studium Carpatho-Ruthenorum – Мeджінародна лїтня школа русиньского языка і културы, выдарить.

Мґр. Домініка НОВОТНА, фото авторкы статї.

 

Script logo