10. 7. 2020: Попращали сме нашого Приятеля

8. 7. 2020 року попращали сме нашого Приятеля бл. п. Богдана Ґамбаля. Похорон зачал ся о 12.00 год. в любіньскій грекокатолицкій церкви свв. Апостолів Петра і Павла.

Богослуыжя служыло двох священників – місцевый парох і приіздный з Пряшова єромонах Маркіян, ЧСВВ. Богдана Ґамбаля пращала родина, приятелі, представникы русиньскых медий та орґанізаций. На похороні присутны были русиньскы делеґациі з Польщы, Словациі і Украіны. Богдан Ґамбаль был похороненый на новым комунальным цмонтери в Любіні. Пращальне слово над труном выголосили по лемківскы др. габ. Олена Дуць-Файфер, Петро Трохановскій, котрый окрем слова од себе прочытал тіж пращальный лист од свого брата – Ярослава Трохановского. Богдана Ґамбаля, як єного з основателів Стоваришыня Лемків, попращал Андрий Копча, ведучый той орґанізациі. В імени Стоваришыня «Руска Бурса» в Ґорлицях і медияльной ґрупы ЛЕМ.фм пращальне слово повіл др Павел Малецкій, єден з членів орґанізациі і редактор нашого радия.

До гробу бл. п. Богдана Ґамбаля была зложена земля з рідной Лемковины – з Чарной при Устю Рускым, одкале походил Його рід, і спід Руской Бурсы в Ґорлицях, котра была облюбленым місцьом Покійного. Вічна Йому Памят!

Севериян КОСОВСКЫЙ, ЛЕМ.фм

(Публікуєме в оріґіналї – лемківскім варіантї русиньского языка.)

Script logo