10. 7. 2024: Вігорлатьскый музей одсвятковав 40 років сканзену. І тото лїто в нїм проходять творчі варштаты
В сканзенї суть скарбы русиньской архітектуры.
Експозіція народной архітектуры і бываня Вігорлатьского музея в Гуменнім – сканзен, пририхтовав на недїлю, 7-го юла 2024-го року, святочне пополудне з богатым проґрамом. Музей собі тов подїёв припомянув 40-ту рочніцю одкрытя сканзену.
Експозіцію по десятьрочнім будованю і здобываню музейных експонатів одкрыли в юли 1984-го року. Сканзен, котрый є в серединї міста, творить ареал із 15-ма обєктами, котры суть із зберной области Вігорлатьского музея – окресів Гуменне, Снина і Меджілабірцї.
Сканзен, котрый каждый рік навщівить понад 6000 людей, і котрый належыть меджі меншы на Словакії, є богатый што до архітектурты і має скарбы русиньской архітектуры.
Домінантов є деревяный храм
Домінантов гуменьского сканзену є Деревяный храм святого Михаіла Архістратига, котрый быв збудованый у 1764-ім роцї, і до Гуменного быв перенесеный у 1974-ім роцї з Новоселіцї, Сниньского окресу.
То характерістічный трипросторовый выходокарпатьскый тіп сакралной будовы із зрубовов конштрукціёв. Тісячі навщівників каждый рік обдивлюють нелем то, як церьков вызерать, але головно зрештаврованый іконостас і оріґіналный престол, котрый є в бароковім штілї, з балдахіном, якый стоїть на штирёх стовпах окрашеных мотівами винограду. Храм є збудованый із ялицёвого дерева і в Новоселіцї стояв близко теперїшнёго цінтеря, на верьшку.
Будовы і з далшых русиньскых сел
Деревяна церьков не є єдиным експонатом, котрый походить із русиньского села. Навщівніцї на штирёх гектарах фундушу можуть відїти і далшы будовы, котры были перенесены почас будованя сканзену до Гуменного з русинськых сел.
Спомянути мож наприклад господарьскый дім з Калной Розтокы в окресї Снина, дім з Вышынкова в окресї Меджілабірцї, котрый має в коморї наіншталовану дїлню колесаря з тіпічным інвентарём, хыжу з Нехваль Полюнкы в окресї Снина ці сыпанець з Выравы, недалеко Меджілаборець.
Сканзен має і господарьскы обєкты як наприклад ковальску майстерню із Нехваль Полянкы ці млин з Вышнёй Яблїнкы, Гуменьского окресу. Вшыткы обєкты мають в інтерьєрі і тіпічный інвентарь, котрый є повязаный з даным обєктом і ёго хоснованём в минулости.
В сканзенї і тот рік творчі варштаты
В Експозіції народной архітектуры і бываня Вігорлатьского музея в Гуменнім і тот рік почас лїта проходить проєкт Ожывлены ремесла. В рамках нёго музей приготовив пять творчіх варштатів, на котрых можете приучіти ся тіпічным ремеслам із минулости.
Три юловы і два авґустовы днї будуть в сканзенї належати гончарьству, роблїню з вівчов вовнов, тканю, корытарьству і ковальству. Вшыткы творчі варштаты будуть проходити під веджінём одборників на дане ремесло.
Петро МЕДВІДЬ, ЛЕМ.фм, языкова і ґрафічна управа: АРК в СР.
