10. 7. 2025: Ватікан выдав становиско односно Литмановой

Дікастерія доктріны віры 9-го юла 2025-го року публіковала офіціалне становиско односно маріяньской учтивости на горї Звір в Литмановій, котра розвивала ся в роках 1990 аж 1995 в позязаню із предположеныма зъявлїнями Дївы Марії.

Становиско є підписане префектом Дікастерії – кардіналом Віктором Мануелом Фернандезом, і є одповідёв на писмо Высокопреосвященого Йоны Максима, пряшівского архієпіскопа і митрополіты, із 27-го мая того року, в котрім пропоновав удїлити nihil obstat (нич не перешкаджать, позн. ред.) „про душпастырьске допроводжіня того феномену“.

Дікастерія успокоїла жадость кір Йоны, котрый вказує за безчісленны „щіры і глубокы сповідї“ і обернутя, і оцїнює „многы духовны плоды, котры здобывають путници, якы не переставають тото місце навщівлёвати“ і наперек тому, же предположены зъявлїня скінчіли перед тридцятёма роками.

Як далше дочітаме ся в становиску Дікастерії, тота аналізовала з тым повязаны посолства. Посолства обсягують „цїнны вызвы на обернутя“. Веце з них повзбуджує віруючіх тым, же вказує, же путь Євангелія не є комплікованов.

В писмі кардінал Фернандез признавать, же обмеджене чісло посолств обсягує „даякы неясны справы і менше зрозумілы части“, но із взятём до увагы того, што ку припаду написала доктрінална комісія у 2011-ім роцї, припущать ся, же то наслїдок внутрїшнёго толкованя предположеных візіонарів.

Дікастерія доктріны віры удїлила жаданый nihil obstat, но акцентує, же то не значіть узнаня надприродной правости предположеных зъявлїнь, але „уможнює схвалити публічный култ і інформовати віруючіх, же покля хотять, можуть без різіка прияти тоту духовну пропозіцію“.

Гора Звір, над русиньскым селом Литманова, є наймолодше путницьке місце Пряшівской ґрекокатолицькой архієпархії. Меджі роками 1990 аж 1995 ся мала ту трём молодым візіонарям, дїтям, обявляти Пречіста Дїва.

Литманівска гора Звір є путницькым місцём од 7-го септембра 2008-го року. Втогдышнїй пряшівскый архієпіскоп і митрополіта Йоан Бабяк выголосив довтогдышнє місце молитвы на горї Звір за путницьке місце на основі факту, же од 1990-го року до Литмановой путує велике множество людей із Словакії, але і споза граніць, „і многы свідоцтва говорять о тім, же путници в Литмановій находять страченый покій душы, черьпають Божу поміч, і по тайнї покаяня зачінають новый період жывота,“ пише ся в установлюючім декретї.

За головный праздник є встановлена недїля по першій пятніцї в місяцї авґуст. Гора Звір має од 2010-го року духовный звяз із папсков базиліков Santa Maria Maggiore в Римі, котра є першым і головным маріяньскым храмом.

Петро МЕДВІДЬ, ЛЕМ.фм, языкова і ґрафічна управа: АРК СР