11. 11. 2025: Позваня на членьску громаду Руського клубу - 1923

Добрый день вшыткым, хочу потвердити свою участь на планованій членьскій громадї дня 12.11.2025, но чом то пишу вшыткым ословленым? Бо мам два вопросы на выбор РК:

1. Хочу ся в першім рядї попросити, чом наш председа з нами комунікує лем по словацькы і ці бы не мало быти позваня членам Руського клубу писане передовшыткым по русиньскы а потім по словацькы, може і наопак, но по русиньскы наісто. 
2. А мій другый вопрос є адресованый цїлому дотеперїшнёму выбору РК, чом ся найблизша членьска громада має одбыти в рештаврації, хоць на Главній уліцї, кедь Руськый дім є вже ку діспозіції ёго членім. Чом понижуєме стрїчу членів Руського клубу тым, же іґноруєме можность конати теперь вже вшыткы ёго громады в ёго домі!? Знам, же кедь уже председа, може з цїлым выбором наплановали найблиузшу громаду в облюбленій і все в тій самій рештаврації нашого председы, так то уже теперь не буде мінити, но ці не стоїти вопрос  так, же в будучности бы ся мали громады РК одбывати все лем в Руськім домі? Тадь тілько председа Федор Віцо за тот Руськый дім боёвав на судох а стрїчі планує в рештаврації! Докінця пропонує наперед якусь „перед-стрічу‟ наперед в Руськім домі а потім громадным походом - напрям Рештаврація Балтік. Інтересна пропозіція. Подля мене бы мала быти стрїча лем в Руськім домі. Але о тім може в діскусії на самотній членьскій громадї. 

  ПгДр. Люба КРАЛЁВА, ПгД., СНМ – Музей русиньской културы у Пряшові