11. 3. 2021: Списало ся уж скоро 60 процент жытелїв. Нижня Писана веде меджі селами

По третїм тыждню од зачатку списованя жытелїв (15-го фебруара) є списаных 58 процент жытелїв Словакії. Найлїпше є на тім Жіліньскый край, де ся уж списало 61,5 процента людей, найгірше Кошыцькый, в котрім є затля списаных лем 51,3 процента жытелїв.

О частковых даных списованя інформовала говоркыня Списованя жытелїв, домів і квартелів 2021 Ясміна Стаудер. Інформацію принесла аґентура TASR.

Меджі селами найлїпша Нижня Писана

Што до крайскых міст, веде Баньска Быстріця з веце як 62-ма процентами списаных. Головне місто Братїслава має списаных скоро 60 процент.

Меджі селами веде русиньске село Нижня Писана в окресї Свідник. Село, в котрім ку кінцю 2019-го року жыло 81 людей, евідує вже 94 процент списаных жытелїв.

„Списованя жытелїв береме за важный проєкт, і зато сьме ку нёму приступили актівно. Каждого жытеля познакомили сьме з проєктом, давали сьме до поштовых скринок інформачны матеріалы і реґуларно додавали інформації. Первенство нашого села ня, самособов, барз тїшыть і єм на нашых жытелїв гордый,“ повів староста Нижньой Писаной Мартін Мочілелнко.

Списованя не одкладайте

Штатістічный уряд Словацькой републікы вєдно з Урядом верейного здравотництва апелують на жытелїв, жебы выужыли безпечну можность списати ся електронічно в комфортї свого домова, і помогли списати ся електронічно своїм старшым членам родины, покля о то пожадають.

Штатістічный уряд так само припоминать, жебы люди списованя не одкладали. Списати ся мусять до кінця марца, асістоване списованя буде проходити од апріля до кінця октобра.

„В часї пандемії хвороты COVID-19 є електронічне списованя жытелїв Словакії найбезпечнїшов формов, як при списованю хранити своє здравя і здравя остатнїх. Зато не роздумуйте і схоснуйте можность списати ся електронічно,  і поможете своїм близкым дома, покля вас о то пожадають,“ повіла говоркыня списованя Ясміна Стаудер.

Списованя є повинне

Повинность списати ся мають подля закона вшыткы жытелї, котры мають на Словакії тырвале, переходне, але і толероване перебываня. Списати ся є повинный і жытель Европской унії, котрый має на Словакы звычайне перебываня. Неповнолїтнї особы є повинный списати родіч, припадно законный заступник. За несповнїня повинности грозить штроф.

Електронічне списованя кінчіть 31-го марца. Од 1-го апріля до кінця октобра буде проходити асістоване списованя про тых, котры ся не годны были списати самы і наголосили ся про поміч асістента.

Петро МЕДВІДЬ, ЛЕМ.фн, языкова управа: ред. АРК в СР