11. 4. 2018: Одбуде ся цїлословацькый конкурз Духновічів Пряшів 2018

Русиньска оброда на Словеньску (РОС) в сполупраці з Окресным урядом, одбором школства в Пряшові выголошують 19. річник цїлословацького конкурзу в декламації русиньской поезії, прозы, властной творчости, малых сценічных форм, духовной декламації і народного розповіданя – Духновічів Пряшів (ДП) 2018.

 

Цїлословацькый конкурз одбуде ся 11-го юна 2018 р. в Театрї Александра Духновіча в Пряшові зо зачатком о 9.00 год. і буде частёв офіціалных святковань Дня Русинів Словакії. В конкурзї можуть брати участь дїти матерьскых і основных школ, штуденты середнїх і высокых школ, а так само дорослы – вшыткы декламаторы, котры на окресных, школьскых ці іншых поступовых змаганях досягли 1. місця або їх порота рекомендовала на поступ.

 

Катеґорії ДП 2018

 

0 – дїти МШ і школярї 1. класы ОШ, 1 – школярї 2. – 3. класы ОШ, 2 – школярїі 4. – 6. класы ОШ, 3 – школярї 7. – 9. класы ОШ, 4 – штуденты середнїх і высокых школ, 5 – дорослы

 

 Жанры ДП 2018

 

Вшыткы жанры конкурзу будуть мати свої катеґорії од 0 до 5. На 19. річнику ДП 2018 бы мали звучати русиньскы творы – поезія (од русиньскых авторів або переклады іншых авторів до русиньского языка), а так само проза в русиньскім языку, властна творчость в русиньскім языку, малы сценічны формы (театралны гры, сценкы) в русиньскім языку, духовна декламація (біблічны історії) в русиньскім языку і народне росповіданя (гуморны пригоды, фіґлі) в русиньскім языку.

 

Оцїнїня участників ДП 2018

 

Каждый участник 19-го річника ДП 2018 буде оцїненый діпломом і приналежнов цїнов. Выконы участників буде оцїнёвати одборна порота, котра придїлить в каждій катеґорії 1. – 3. місце а наконець буде выголошеный Лавреат 19-го річника ДП 2018.

 

Teхнічны пожадавкы

 

Подорожнє, кост про декламаторів, педаґоґічный допровод і цїны про переможців забезбечіть главный орґанізатор конкурзу РОС і Окресный уряд, одбор школства в Пряшові. Подія ся реалізує з фінанчнов підпоров Фонду на підпору културы народностных меншын.

 

Посыланя приглашок

 

Выповнены приглашкы на тогорічный конкурз ДП 2018 треба послати найпізнїше до 30-го апріля 2018 р. нa aдресу: Rusínska obroda na Slovensku, Mgr. Peter Medviď, Masarykova č. 20, 080 01 Prešov або на імейлову адресу ґаранта проєкту peter.medvid@gmail.com.

 

Окресны конкурзы і выберы

 

На основі приятых приглашок і кількости приголошеных участників орґанізаторы будуть рїшыти о зорґанізованю окресных конкурзів і выберів в окремых реґіонах, о чім будуть приголошеных вчас інформовати. Окресны конкурзы і выберы в окремых реґіонах будуть проходити в термінї од 20-го мая 2018 р. і запрошіня на окресный конкурз буде приголошеным загнане імейлом.