11. 5. 2017: На Словакії схвалили фонд про меншыны (!!!)

Словацькый парламент на своїм засїданю 10-го мая 2017-го року схвалив Закон о Фондї на підпору културы народностных меншын. 101 посланцїв Народной рады Словацькой републікы голосовало за приятя закона, 13 в голосовало проти і 22 ся стримало голосованя. Фонд выникне ку 1-му юлію 2017-го рока.

Як пише на своїм офіціалнім сайтї коалічна партія Most-Híd, котра пришла з пропозіціов того закона, дякуючі зряджіню фонду компетенція приділёваня дотацій про народностны меншыны перейде із Уряду влады Словацькой републікы на нову верейноправну інштітуцію, котра до културы принесе раз тілько грошей, як дотеперь. Цїлковый розрахунок інштітуції на єден рік буде 8 міліонів евр.

Конрад Ріґо, державный секретарь Міністерства културы Словацькой републікы із партії Most-Híd підкреслив, же зряджіднём фонду буде забезпечена културна незалежность народностных меншын на Словакії.

„Є то вызначный крок, нелем про меншыны, але про цїлу країну. Култура народностных меншын обогачує културу цїлой Словакії. Приятя того закона то адекватно сімболізує,“ повів Ріґо.

Фонд має забезпечіти транспарентный і якостный одборный поступ при розділёваню грошей і має підпорити всокочіня, выражіня, охрану і розвиток індентічности културных вартостей народностных меншын. Приголошены проєкты мають по новому оцінёвати одборны рады, в складї котрых мають мати своїх представителїв одборници з конкретных областей културы (!!!). Із 8 міліонів евр, котры каждый рік прийдуть про меншыны, будуть 4 процента схоснованы на ход інштітуції і решта буде роздїлена про меншыны. Першы вызвы фонду бы мали быти выголошены зачатком 2018-го рока.

Сістематічна підпора културы народностных меншын ся дістала до проґрамового выголошіня сучасной словацькой влады. Належало то міджі єдну з найважнїшых пріоріт коалічной партії Most-Híd. Закон, котрый быв приятый, выходить із посланецькой пропозіції Ласла Шойомоша із 2015-го року, на приготовлїню закона брали участь і Ласло Буковскый, уповномоченый про народностны меншыны і єтнічны ґрупы і Абел Равас, уповномоченый про ромскы комуніты.

Напрік тому, же Словакія прияла закон, котрым хоче сістематізовати фінанцованя културы народностных меншын, держава дотеперь не має приятый закон о народностных меншынах. (!!!) Так як дотеперь, і з нового фонду на свої проєкты будуть мочі черьпати 13 народностных меншын, котры суть на Словакії узнаны. Русиньска народностна меншына є по мадярьскій і ромскій на Словакії офіціално третёв найвекшов, што так само має вплив на множество грошей, котры з фонду меншына може черьпати.

Жрідло фотоґрафії: dennikn.sk

Script logo