11. 5. 2018: Вартости без вартости

Геннадій Москаль рядить на Українї область, де корінным народом од давных часів Русины. Наперек тому проблем Русинів не видить. Вопросом є, як барз може грызти сумлїня при такій слїпотї.

Перед часом быв на порталї україньской редакції Радія Свобода публікованый розговор із головов Закарпатьской областной державной адміністрації Геннадіём Москалём. В нім Москаль доста ясно ставлять ся на бік Мадярів, котры жыють в тій области, обгаює їх права. Просить ся, же покля україньскы законы доволяють їм хосновати сімболіку Мадярьска, говорити і вчіти ся їх родным языком, співати свої співанкы, чом бы то не мали робити. Споминать, же Україна має договоры з Мадярьском, котры были ратіфікованы парламентом, не забуде підкреслити, же покля Україна хоче іти до Европы і НАТО, потім треба знати, же охорона народностных меншын є про Европу свята.

Не знаючі сітуацію, чоловік бы собі подумав, же чітать розговор з політіком, єдным із мала політіків на Українї, котрый розуміє о чім говорить і досправды му іде о то, жебы Україна дотримовала тоты европскы вартости, котры дотуляють ся меншын, і він з тым нелемже не має проблем, а звертать увагу на то, же то так мать быти, бо на то меншына має право. Но то лем зданя, бо він сам одкрывать у тім самім розговорї, же фразы о европскых вартостях ся научів добрї, но од думаня в рамках тых вартостей має так далеко, як із Ужгорода до Києва, кедь не веце.

Радіо Свобода, котре бы само мало пошырьовати европскы, респектівно западны вартости, но україньска редакція уж якось давнїше перешла на шырококоляйну штреку при пошырёваню інформацій, на своїм порталї публіковало і высловы Москаля, в рамках котрых бісїдує, же Криму на Закарпатю не буде. Знам собі представити, же параноідному Радію Свобода, котре уж видить неприятеля Україны і в Атілови, котрый з дїми дома бісїдує по мадярьскы, такы слова не стачать, но не тото є у Москаля основне. Москаль такой коло того говорить: „Вшытко, што ту Росія задумовала, вшытко програла. Так званый вопрос Русинів, посмосьте, де є? По тім, як тот, кому інштрукції давав Сурков, втік до Москвы, вшытко затихло.“ І ту ся кінчіть ілузія о політікови, котрый розуміє европскым вартостям о охранї народностных меншын.

Політік, котрый іщі перед перед недевном бісїдовав о даякых правах меншын, о европскых вартостях, котры суть святы, і кедь Україна хоче іти до Европы, мусить їх дотримовати, у вопросї Русинів пробудив у собі класічного україньского політіка, котры декомунізують вшытко, лем не своє думаня, котре собі з ґенерації на ґенерацію передавають іщі од Сталіна.

Русиньскый вопрос на Підкарпатю не є од Криму, тот вопрос є ту од розпаду союзу. Русиньскый вопрос, вопрос признаня прав Русинів і їх узнаня як офіціалной народностной меншыны, ту не є од Суркова, тот вопрос ту є так само од зачатку єствованя незалежной Україны. І русиньскый вопрос не є проєктом Москвы, є то природный возродный рух збудованый на европскых вартостях, на европскій історії, европскых концепціях, бо Русины европскый народ. То, же то Москва любить з часу на час схосновати на свій хосен, є правдов, но Москва бы не мала што хосновати, кебы Україна Русинам права дала і їх узнала. І што є найосновнїше, русиньскый вопрос не стихнув, ани ниґда не стихне, покля не буде справедливо вырїшеный, так як то Русинам у вшыткых державах, і на Українї, забезпечують людьскы права і права народностных меншын, котры суть ясно дефінованы в меджінародных документах, котры має підписаны і Україна.

Як може політік, котрый з єдного боку говорить о правах меншын, говорити такой о єдній меншынї в смыслї, як кебы їй тото право не належало, же як стихнув Кремель, та властно уж є вшытко в порядку, як кібы Русины были лем выдумков Москвы? Іронічне – той Москвы, котра нам право на існованя на довгы рокы сама взяла.

Не знам, як міцно може грызти сумлїня, покля політік вырїшыть терпіти таков слїпотов. Но знам, же покля в тій слїпотї хоче Москаль або будьхто іншый з політіків продовжовати, потім суть їх слова о европскых вартостях лем каломучінём воздуху коло себе і в реалности суть про них тоты самы вартости без будьякой вартости. І держава з таков політіков належыть десь інде, лем не до Европы.

Петро МЕДВІДЬ

(Статя была написана як коментарь „Вступне до контроли“ лемківского радія lem.fm. Жрідло фотоґрафії: Wikipedia, „Iділa на Українї‟.)

Script logo