11. 7. 2017: Русины в Мадярьску реаґують на Кравченка

Представителї Русинів в Мадярьску – Віра Ґіріц, посланкыня Русинів у мадярьскім парламентї і Віктор Крамаренко, председа Вседержавной русиньской самосправы, офіціалным комуніке зареаґовали на слова председы Вседержавной україньской самосправы в Мадярьску – Юрія Кравченка, котрый зачатком юлія на конферецнії в Будапештї перед журналістами із Підкарпатя говорив, же у Русинів у Мадярьку чує вплив Росії, і же суть фінанцованы Москвов. Далше были на пресконференції высловлены думкы, котры спохыбнюють екзістенцію Русинів.

„Як представителї русиньской громады Мадярьска выражаєме побуреня і протест, і ініціюєме приятя потребных дій. На основі Конштітуції Мадярьска і цїлой єй леґіслатівной сістемы кажда народность має право на екзістованя як етнічна громада. Русиньскый народ має неоднятне право на всокочіня і розвиток народной ідентічности громады, історічных традіцій, материньского языка, збогачованя духовной културы,“ пише ся в комуніке, котре было публіковане на офіціалнім сайтї Вседержавной русиньской самосправы в Мадярьску.

„Дізнали сьме ся, і маєме жрідла інформацій, же 7-го юнія 2017-го року у Будапештї Любов Непоп, надзвычайный і повномочный посол Україны в Мадярьску, і Юрій Кравченко, председа Вседержавной україньской самосправы, стрїтили ся із підкарпатьскыма новинарями. То, што прозвучало на конференції, зпохыбнює екзістенцію русиньского народа, ёго материньского языка, многорічных традіцій, історічной минулости. На потверджіня нашого выголошіня мы опубліковали матеріалы з пресконференції, протовмачены на мадярьскый язык і коментарї на них, електронічну адресу жрідла, оріґіналный текст конференції і писмо председы Вседержавной русиньской самосправы Віктора Крамаренка і посланкынї Русинів у мадярьскім парламентї Віры Ґіріц председови Всеедржавной українськой самосправы Юріёви Кравченкови на нашім сайтї www.ruszin.com,“ закінчує ся офіціалне комуніке.

Припоминаме, же 14-го юнія 2017 была на сайтї Mukachevo.net публікована статя „Юрій Кравченко: Українське самоврядування в Угорщині має прекрасні відносини з аналогічним русинським самоврядуванням,“ котра принесла інформації о тім, што председа україньской самосправы говорив о Русинах за участи Любов Непоп в рамках пресконференції. О кавзі на нашім сайтї найдете і коментарь під назвов Добра рада. Запис із пресконференції можете посмотрити собі за тым мотузком. Перепис найдете ту.

П. М., фотоґрафія: Юрій Кравченко, жрідло: www.mukachevo.net.