11. 8. 2018: В Пєнїнах ославлёвала ся култура Русинів-Лемків

Русины творять велику часть жытелїв реґіону северного Спіша і Пєнїн. Наперек тому, же іде о народность без властной державы, дотеперь утримали сі свої звыкы, традіції, културу і традічну страву. Часть з них, Лемкы, ся 22. юла 2018 стрїтила в Червенім Клашторї.

Олавы културы Русинів-Лемків ся в ареалї купелїв Червеный Клаштор-Смерджонка одбыли ся 22. юла 2018 уж по третїраз. Были то ославы културы, русиньского языка і русиньской ґастрономії. Їх інтеґралнов частёв была і ґрекокатолицька літурґія. „Русины, котры себе радше называють Руснаци, мають свою богату културу і окреме поставлїня з погляду утриманя собі своїх цїнностей і традіцій. Не залежыть о на тім, о яку ґрупу Русинів іде. Наперек тому, же Лемкы суть Русины, але жыючі в Польщі, часто навщівляють наш реґіон і стрїчають ся з тутешнїма Русинами,‟ повіла Інж. Еріка Шалатова, выконна директорка Областной орґанізації турістічного руху на трасї Северный Спіш – Пєнїны.

Култура Русинів, враховано Лемків, є спеціфічна і богата. Русиньскы співанкы суть прекрасны, чутёвы і щіры. Вецеголосны співы можуть выклакати у слухателїв і позерателїв „гусячу скору.‟ „Окрем языка і співанок, далшым інтересным аспектом културы Русинів є віра і реліґійна традіція, обрядовы, ославны звыкы і народна архітектура сакралных будов,‟ продовжує Е. Шалатова.

Розмаїтость културы Русинів была підкреслена на святї богатым културным проґрамом. Ґрекокатолицьку літурґію у церьковнославяньскім языку одслужыв попрадьскый  протопресбітер Ярослав Матоляк. Фоклор є далшов самобытнов характерістіков Русинів. Доднесь многы жены носять прекрасны русиньскы крої. То найлїпше з русиньскых народных співанок прозвучало в рамках фолклорного роґраму А чія то хыжа. В рамках нёго выступили aй фіналістy і выступаючі з телевізной релації „Zem spieva 2018“ , але тыж лемківскый ансамбель з Польщі. Участници і любителї русиньской културы тїшыли ся і з выступлїнь далшых ансамблїв і фоклорных ґруп.

„Реґіон северного Спіша і Пєнїн вызначує ся петростёв у каждім смерї. На малій теріторії жыє много рїзных народностных меншын і етнічных ґруп, котры собі доднесь утримали то, што їх робить самобытныма, і так приспівають і к оріґіналности нашой теріторії і єй атрактівности,‟ додала на конець Е. Шалатова.