12. 1. 2018: 4-ый річник Літературного конкурзу Марії Мальцовской має своїх оцїненых

Оцїнены авторы і члены пороты 4. Літературного конкурзу М. Мальцовской, якы на нїм были притомны: (злїва) Ш. Сухый, М. Голубкова, М. Мігаліч, В. Сивый, Ю. Харитун і К. Копорова.

 

Вітяз 4. Літературного конкурзу Марії Мальцовской у Пряшові Владіслав Сивый зо женов Янов.

 

Децембер бывать звычайно ай місяцём закінчованя річных проєктів. Єден з такых проєктів, котрый десятый рік орґанізує Сполок русиньскых писателїв Словакії є проєкт Літературный конкурз (четвертый рік быв проєкт схваленый на реалізацію під назвов: Літературный конкурз Марії Мальцовской). Заключный семінар ід конурзу ся одбыв 21. 12. 2017 в Бібліотецї карпаторусиністікы Інштітуту русиньского языка і културы Пряшівской універзіты в Пряшові і так четвертый річник конкурзу уж має своїх оцїненых.

 

До тогорічного конкурзу ся приголосило 8 авторів, з того двоє новых – зачінаючіх. Двоє авторів послало по два жанры, также одборна порота в зложіню: К. Копорова, М. Павліч і М. Голубкова оцїнёвала довєдна 10 оріґіналных творів поезії і прозы в русиньскім языку. Перше місто здобыв автор, котрый ся до конкурзу приголосив по першый раз – Владїслав Сивый (Пряшів, поезія), друге місце належало двом авторам. Были то – Штефан Сухый (Стащін, поезія) і Юрко Харитун (Кежмарок, поезія), а на третїм місцї скінчіла авторка Людміла Шандалова (Свідник, поезія).

 

Урывкы із вшыткых творів посланых до конкурзу будеме, як традічно, публіковати в часописї Русин – рубріцї Поздравлїня Русинів на рік 2018. Оцїненым ґратулуєме і жычіме много сил до далшой творчой роботы на благо Русинів.

 

Кветослава КОПОПРОВА,

председкыня Сполку русиньскых писателїв Словеньска,

фото: Ева Харитунова і Міхала Голубкова