12. 1. 2026: Різдвяна «Бесіда» з календарьом на Новый 2026 Рік
«Календар Бесіды» од років гостит в лемківскых хыжах.
Початок Нового Рока то фурт добрый час, штобы придбати остатній номер часопису «Бесіда» за 2025 р. – пресового орґану Стоваришыня Лемків. То ч. 6 (207) за місяці листопад/груден 2025 р. Різдвяно-новорічне чысло приносит нам традицийно «Календар Бесіды на 2026 рік», якій радо вішаме в нашых хыжах.
Як раз при нагоді різдвяного часу часопис з календарьом годны сте придбати в дакотрых парохіях ци в рамках продолжыня пренумераты.
Теперішній номер витат нас уж святочно-новорічно. При нагоді богатый є в реляциі з подій, якы проходили осіню. В посліднім выданю за 2025 р. прочытаме м.ін. статі:
- Севериян Косовскій, Ювілей Богдана Горбаля, лемківского історика, якій тримат звязок зо Старым Крайом;
- Наталия Малецка-Новак, Рефлексиі до выставы «Може ся верну» Давида Здобыляка;
- Петро Медвідь, Потопа іде на найпрестіжнійшый фестіваль Латиньской Америкы. Фільм є смутном історийом Русинів при будуваню Старины;
- Петро Трохановскій, ХХХІІІ Лемківска Творча Осін;
- Андрий Ковальскій, 25 років «Ластівочкы»;
- Петро Трохановскій, Двадцет років тому лишыл нас Василь Турок-Гетеш.
Безмінно чытати можете част «Новины, не новины – не лем з Лемковины». Не бракує і выімків з інчых часописів і ґазет, што тыкают нашых справ.
Традицийно тіж до посліднього номеру за даный рік долученый єст славный і уж культовый «Календар Бесіды» – тепер уж на 2026 р. В календари поміщено церковны праздникы за юлияньскым рахуваньом.
Двомісячник «Бесіда» то часопис Головного Заряду Стоваришыня Лемків, выходит од 1989 рока, присвяченый єст збережыню істориі, культуры і языка Лемків, інформуючый о жытю нашой і братніх нам соспільности, плекаючый вірні надіі прадідів і вітців.
«Бесіду» мож почытати в бібліотеці Руской Бурсы в Ґорлицях. Ґазета є тіж доступна в локальных Кружках Стоваришыня Лемків в Польщы.
Найновшый номер, як тіж архівальны номеры часопису «Бесіда» годны сте придбати в електронічній версиі на сайті www.stowarzyszenielemkow.pl.
(Публікуєме в оріґіналї – лемківскім варіантї русиньского языка.)
