12. 3. 2025: Міністерство інвестіцій в окресі Снина рїшыло підпору сел

Міністерство інвестіцій, реґіоналного розвитку і інформатізації Словацькой републікы од 7-го марца 2025-го року спустило можность здобыти про реґіоны высше 30 міліонів евр. Інформовала о тім аґентура TASR.

Про села до 1000 жытелїв выголосило міністерство вызву з назвов Жыве село. Як повів у пятніцю на резортнім днї в Довгім над Цірохов, Сниньского окресу, міністер Ріхард Раші, на реалізацію проєктів є выдїленых понад 4 міліоны евр із державного розрахунку.

„Тоты найменшы села, котры мають до 1000 жытелїв, і є їх на Словакії понад 2000, будуть годны черьпати фінанчны средства, і кедь ся їм то дотеперь не дарило,“ доповнив Раші. Припоминаме, же Русинами населены села суть векшынов до 1000 жытелів, належать ку так званым малым селам.

Вызва, котру резорт інвестіцій спустив, є заміряный на підпору турістічного руху, захованя културной ідентіты, стараня ся о културну дїдовизну і розвиток обчаньской інфраштруктуры. Із вызвы будуть підпорены такы проєкты як реконштрукції деревяных храмів, реконштрукції войновых цінтерів, накуплїня фолклорных кроїв ці забезпечіня музичных інштрументів. Вызва є одкрыта про проєкты із цїлой теріторії Словакії.

Далшов формов помочі реґіонам в рамках веце як 30-міліонового паклика грошей є вызва на центры дїленых служеб. Выникнути їх має 21, і їх цїлём є сполочне выконованя аґенды самоспсрав. Подля міністра Ріхарда Раші із той вызвы будуть підпорены адміністратівны, технічны і аналітічны капаціты, значіть фаховы робітници.

Державный секретарь Міністерства інвестіцій, реґіоналного розвитку і інформатізації Словацькой републікы Михал Калиняк акцентовав, же то пілотный проєкт. „Віриме, же обстоїть. Частков центрів дїленых служеб буде веце як 400 самосправ, котры суть домовом про веце як 570 тісяч жытелїв,“ повів Калиняк.

В тім роцї продовжує і підпора найменше розвитых окресів, на котру є алокованых понад 11,5 міліона евр. Змінов закона о підпорї найменше розвитых окресів на закон о пріорітных окресах буде окрес Снина записаный до списку пріорітных окресів.

Припоминаме, же на списку найменше розвитых окресів у четвертім кварталї 2024-го року были і далшы окресы, в котрых жыє русиньске населїня – Свідник, Воронів над Топлёв, Бардейов, Меджілабірцї, Стропків і Стара Любовня.

Петро МЕДВІДЬ, ЛЕМ.фм, языкова і ґрафічна управа: АРК СР.