12. 4. 2016: Убля буде центром конференції

Село Убля, котре ся находить в окресї Снина, 20-го апріля 2016-го року (середа) буде центром конферецнії. Тоту там під назвов Русиньска і жыдівска културна дїдовизна – неоддїлительна часть европской дїдовизны орґанізують Карпатьскы деревяны церькви, безпрофітова орґанізація (Karpatské drevené cerkvi, n. o.) і Фундація про охрану біодіверзіты Карпат (Nadácia pre ochranu biodiverzity Karpát).

На конференції, котра є орґанізована в рамках підпорного проєкту із проґраму Всокочіня і ревіталізація културной і природной дїдовизны і Підпора розмаїтости в културї і уменю в рамках европской културной дїдовизны, буде може выслухати інтересны лекції о русиньскій церьковній архітектурї, о кіріло-мефодійскых памятках в окресї Снина ці о жыдївскых памятках і цінтерях на тій теріторії.

Безпрофітова орґанізація Карпатьскы деревяны церькви была заснована у 2012-ім роцї на прінціпі партнерства самосправ і обидвох церьквей выходного обряду (ґрекокатолицькой і православной). Цїлём є сполочный поступ при всокочіню, обнові і презентації деревяных храмів.

Орґанізація ся замірявать на гляданя пристойных способів хоснованя церьквей в припадах, кідь їх із різных причін не мож хосновати на богослужіня. Окремо ся орґанізація орьєнтує на самосправы з цїлём ефектівно схосновати потенціал деревяной церьковной архітектуры про розвиток економічно слабшых пригранічных реґіонів. Із той причіны є векшына актівностей в сучасности концентрована на окресы Снина і Собранцї.

Конференція зачінать о 10.00 год. в убляньскім Културнім домі.