12. 5. 2016: Значіня і вклад Василя Сочкы-Боржавина

Словацькый народный музей – Музей русиньской културы і Русиньске културно-освітнє общество Александра Духновіча в Пряшові Вас сердечно позывають на одборный семінар під назвов Значіня і вклад Василя Сочкы-Боржавина (19222010), історіка літературы, педаґоґа, поета, есеісты, публіцісты і културного діятеля Русинів 20-го столїтя.

Семінар ся одбуде 21-го мая 2016 од 11.00 год.  у просторах СНМ – Музею русиньской културы в Пряшові, ул. Масарікова ч. 20, 1-ый шток. Із рефератами о цїіложывотній творчости Василя Сочкы-Боржавина выступлять на семінарі Ольґа Ґлосікова, директорка Музею русиньской културы, Гавриїл Бескид, председа Русиньского културно-освітнёго общества Александра Духновіча, Тібор Міклош Поповіч, русиньскый діятель з Будапешту і Юрко Харитун, русиньскый поет і председа Сполку Русинів Спіша. На семінарі приобіцяли участь пані Ірина, жена небогого Василя Сочкы-Боржавина і ёго дївка Надежда, котры жыють теперь у Чехії.

Василь Сочка, псевдонім Боржавин, народив ся 3-го януара 1922-го року в Берегові на Підкарпатю, втогдышня Чехословакія. По закінчіню руськой ґімназії в Хустї, у 1940-ім роцї, зачав штудовати почас войны на Будапештаньскій універзіті, но закінчів аж Ужгородьску універзіту у 1950-ім роцї. Робив у редакчній колеґії ґазеты Закарпатська правда, быв бібліоґрафом Закарпатьской областной універзалной науковой бібліотекы, быв і ведучім оддїлїня Закарпатьского інштітуту здоконалёваня учітелів.

Писати зачав іщі на ґімназії, першу поетічну збірку, писану по російскы, выдав у 1940-ім роцї під назвов Горы и доля. У часї по падї комунізму Сочка брав єдну із найважнїшых ролей у русиньскім русї Підкарпатя. Быв співзаснователём і головов Обчества карпатьскых Русинів, быв членом Світовой рады Русинів при Світовім конґресі Русинів, брав участь на многых конференціях. Публіковав серію біоґрафій під назвов Будителі карпатськых русинов, зібрку русиньской поезії В подпескидных долинах і збірку нарисів і приговорів присвяченых русиньскій літературї під назвов Зазвонили в селѣ на вичурню. Умер у 2010-ім роцї.

П. M.

Script logo