12. 6. 2016: Навщіва Інштітуту русиньского языка і културы ПУ в рамках лїтнёй школы

Уже од недїлї проходить 7. річник Міджінародной лїтнёй школы русиньского языка, на котрім беруть участь люде з веце країн світа. До проґраму была на день 9. юна 2016 запланована і навщіва Інштітуту русиньского языка і културы Пряшівской універзіты в Пряшові, котрый є главным орґанізатором того едукачного 3-тыжднёвого проєкту.

Участникам были представлены просторы інштітуту а главно ёго бібліотека, як фізічна, так і діґітална. ПгДр. Кветослава Копорова, ПгД. привітала участників на інштітутї і росповіла їм історію ёго взнику і ёго далше фунґованя. Представила найважнїшы проєкты і актівіты, котры ся на інштітутї роблять, дїла, якыма ся занимають і одборны публікації, якы выдає. Участници ту мали можность відїти і презентацію найновшых публікацій, якы на Словакії выходять у сферї лінґвістікы, історії і белетрістічной літературы.

В просторах інштіуту продовжовав і далшый проґрам лїтнёй школы. В найвекшій бібліотецї карпаторусиністікы в Европі ся одбыла і презентація філму Мій Никифор о русиньскім інсітнім умелцёви Епіфанови Дровнякови, котрого лїпше знають під меном Никифор Криницькый. Якраз до музея ёго творчости в містї Криниця у Польску ся на далшый день (10. юна 2016) в рамках екскурзії путовало.  

Мґр. Зденка ЦІТРЯКОВА, інтерна докторандка Інштітуту русиньского языка і култуты Пряшівской універзіты в Пряшові

Script logo