13. 1. 2025: Анімованыма приповідками ближе ку дїтём

Приповідкы неоддїлительно належать ку дїтинсту. Так як технолоґії неоддїлительно належать ку днешнїй добі. Серію десятёх ЦД Русиньскы приповідкы выдало О.З. молоды.Русины іщі скоріше. Почас остатнїх трёх років ку ним прибыли і авдіовізуалны приповідкы.

Автором думкы і проєкту під назвов Анімованї i по русиньскы є член О.З. молоды.Русины Петро Ярінчік. Ідея приближыти дїтём русиньскы приповідкы в модерній анімованій подобі у нёго выникла автоматічно по основаню своёй властной родинкы.

В роках 2022 аж 2024 дістали авдіовізуалну форму приповідкы з уж споминаных ЦД Слон і мышка, Як ся сын научів пінязї зарабляти і Ангелів дарунок. І уж занедовго ку ним прибуде і дялша – Непотрібна хмарка.

Остатня споминана приповідка выникла на основі мотіву Ерікы Костёвой, за драмаруґіёв і режійов стоїть Яна Трущіньска-Сива, за музиков і звуком Владислав Сивый. Приповідку Непотрібна хмарка начітав Михал Куцер.

Єднако як в попереднїх трёх припадах, анімовану подобу  дістала і тота приповідка вдяка скушеному аніматорови, ілустраторови і ґрафічному дізайнерови Янови Іванови.

Подля слов основателя проєкту Петра Ярінчіка суть днесь дїти штодень в контакті з модерныма технолоґіями і родічі автоматічно пущають дїтём анімованы приповідкы, ці на словацькім языку або на іншых языках.

„Цїлём проєкту є приближыти ся головно меншым дїточкам, і такым способом у них підпорёвати і розвивати русиньскый язык і народностну ідентіту‟, повів Петро Ярінчік. Анімованы приповідкы мож посмотрити на YouTube.

Проєкт Анімованї i по русиньскы быв реалізованый з фінанчнов підпоров Фонду про підпору културы народностных меншын.

Анна ЗАМУТОВСКА, здрой: ЛЕМ.фм. Языкова і ґрафічна управа: АРК в СР.