13. 4. 2021: Русиньскый священик нагородженый Орденом мадярьского золотого креста

Як інформовало на своїм сайтї Вседержавне русиньске самосправованя, в марцї 2021-го року презідент Мадярьска Янош Адер своїм рїшінём нагородив Орденом мадярьского золотого креста ґрекокатолицького священика і русиньского патріота Яноша Мігаля Соноцького.

Презідент так зробив на пропозіцію премєра Віктора Орбана. Номінація Соноцького была за ёго діятельство у консолідації і представлёваню інтересів русиньской комуніты жыючой в Мадярьску, за сохранїня і популаріацію русиньской културы в Мадярьску.

Янош Мігаль Соноцькый є священиком Мішколцьской ґрекокатолицькой єпархії на пензії, заступник председы Общества Русинів/Рутенів Мадярьска. Довгодобо є в Мадярьску і за граніцями знамый як тот, котрый хоронить русиньскы традіції.

Народив ся 6-го мая 1954-го року у Шаёвсентпейтерї. По закінчіню Нїредьгазького теолоґічного інштітуту у 1978-ім роцї го єпіскоп Др. Сілард Керестеш рукоположыв на сященика у селї Ракаца. Свою путь душпастыря зачав Янош Мігаль Соноцькый у Овзді як каплан, а дале служыв парохом у селах Модёровшка, Філкегаза, Ґадна, Абауйсантов і Шаёвпетрї. Як священик пізнїше діяв у мішколцьскім шпыталю і соціалнім домі.

Отець Соноцькый написав много статей до реліґійных періодічных выдань Görögkatolikus szemle (Ґрекокатолицькый обзор) і Keresztény élet (Хрістіаньськый жывот). Од 2011-го року быв головным редактором часопису Русинів у Мадярьску Русинськый Світ – Ruszin Világ. Доднесь є редактором той ґазеты.

Презідент Янош Адер отцёви Соноцькому, але і далшым шестём священикам Мадярьской ґрекокатолицькой церькви удїлив ордены 15-го марца 2021, коли є в Мадярьску державне свято – Мадярьске народне свято револуції і боя за слободу.

Петро МЕДВІДЬ, ЛЕМ.фм, языкова і ґрафічна управа: ред. АРК в СР.