13. 5. 2026: В Грабскім припомянули собі 50 років од смерти священомученика Василя Гопка

В недїлю, 10-го мая 2026-го року, в Грабскім, роднім селї блаженого священомученика Василя Гопка, пряшівского помічного єпіскопа, одбыв ся архієпархіалный одпуст, котрым собі духовенство і віруючі Ґрекокатолицькой церькви на Словакії припомянули 50 років од смерти блаженого.

Головным пунктом одпусту была Архієрейска літурґія, котру в церьковнославяньскім языку одправляв Высокопреосвященый владыка Йона Максим, пряшівскый архієпіскоп і митрополіта. Вєдно із ним служыв і Преосвященый владыка Курт Бурнетт, єпархіалный єпіскоп Пассаіку, США, котрый є в тім часї на робочо-душпатырьскій навщіві в Европі. Вєдно із нима служыло понад 30 священиків. На торжестві брало участь і много монашок і віруючіх із шырокой околіцї.

В проповідї глава Ґрекокатолицькой церькви на Словакії вказав на веце історічных фактів із жывота блаженого, причім выходив із свідоцтва єромонаха Атаназа Пекаря, ЧСВВ, котрый о владыкови Василёви повів тоты слова: „Владыка Гопко не глядав славу. Не домагав ся справедливости. Ани не жадав помстити ся. Вшыткых любив, вшыткым одпущав і мав намагу послужыти своїй єпархії як помічный єпіскоп.“

Кір Йона акцентовав у проповіді жертвенну службу священомученика Василія по роцї1968, коли наперек підломленому здоровю повзбуджовав віруючіх, рукоположыв священиків і помагав при обнові церьковного жывота. Єдночасно быв простый, близкый ку обычайным людям і мав способность нести терпіня в тихоти і довірї в Бога.

На кінцю торжественной літурґії приговорив ся і владыка Курт, котрый підкреслив особность владыкы Василія як мужа, котрый в тяжкых часах комунізму зістав вірный Божому слову і Святішому Отцёви, причім вказав на реалность днешнёй добы, котрій не домінує жадне обмеджіня слободы ці віросповіданя.

+ + +

Василь Гопко народив ся 21-го апріля 1904-го року в Грабскім. Про свою віру і вірность Папови Римскому быв почас тоталітного режіму арештованый і переслїдованый. Вмер 23-го юла 1976-го року. Вселеньскый архієрей Йоан Павел ІІ. го выголосив за блаженого у 2003-ім роцї в Братїславі. Ґрекокатолицька церьков собі ёго праздник припоминать 11-го мая, в день, коли прияв у 1947-ім роцї єпіскопску хіротонію. Ёго мощі суть уложены в бочній каплічцї Катедралного собору святого Йоана Крестителя в Пряшові.

Выбране і скорочене із статї Петра МЕДВІДЯ, ЛЕМ.фм. фото: Мілан Дзурняк. Ґрафічна і языкова управа: АРК в СР.