13. 6. 2018: Бранїслав Бандуріч став ся лавреатом Духновічового Пряшова 2018

Вже 19-ый річник цїлословацького конкурзу в декламації русиньской поезії, прозы, властной творчости, народного розповіданя, духновной декламації і малых сценічных форм Духновічів Пряшів 2018 проходив 11-го юна 2018-го року на Великій сценї Театру Александра Духновіча в Пряшові.

Цїлословацькому конкурзу передходили реґіоналны конкурзы, котры одбыли ся в окресах Стара Любовня, Свідник, Снина і Меджілабірцї. Із тых окресів поступали на цїлословацькый конкурз тоты декламаторы, якы здобыли у своїм окресї першы місця. Прямый поступ мали декламаторы за окресы Бардеёв і Гуменне, де реґіоналны конкурзы із причіны малой кількости приголошеных не проходили. Цїлково так на цїлословацькім конкурзї змагали ся декламаторы із шестёх окресів.

 

80 декламаторів у Пряшові

Духновічів Пряшів офіціално одкрыв на сценї нашого театру Мартін Караш, председа Русиньской оброды на Словеньску, котра є головным орґанізатором конкурзу. Журї была тот рік в складї Маріан Марко – директор Театру Александра Духновіча як председа пороты і членове Анна Кузмякова – основателька Духновічового Пряшова, Іґор Латта – довгорічный актор нашого театру, Ярослав Фецуш і Петро Медвідь.

Цїлково брало участь по реґіоналных конкурзах на цїлословацькім торжестві нашого літературного слова 80 декламаторів ці выступаючіх в рамках малых сценічных форм. При усвідомлїіню собі факту, же основне русиньске школство скоро не функціонує, аж на два выняткы, і дїти ся учать русиньскый язык векшынов лем в рамках вечернїх школ, тото чісло дїтей нас може досправды тїшыти. Кедь ку ним прирахуєме тых, што до Пряшова не поступили, діставаме ся ку досправды шумному чіслу. Но то значіло і нелегке оцінёваня про журї, котра мала досправды много роботы. Выступаючі змагали ся у 6-ёх віковых катеґоріях, од дїтей матерьскых школ аж по дорослых, якы были іщі подїлены на окремы жанры.

 

Лавреат – Бандуріч, оцїнена і школа в Кленовій

По выголошіню резултатів конкурзу мож конштатовати, же каждый окрес собі однїс даякы оцїніня, што свідчіть о тім, же русиньскы декламаторы мають своїх якостных представителїв у каждім кутї северовыхдной Словакії.

Лавреатом, значіть цїлковым вітязом конкурзу Духновічів Пряшів 2018, став Браніслав Бандуріч, школярь восьмой класы Основной школы в селї Убля. Хоць тот рік у своїй катеґорії здобыв друге місце, журї довгодобо слїдує того декламатора, котрый бере участь на конкурзї одмаленька, ці в катеґорії народного розповіданя або в катеґорії прозы. Бранїслав Бандуріч належыть меджі тых, у котрых відїти розвиток в области декламації і ёго языковый прояв є єдным із найчістїшых.

І тот рік дала на Духновічів Пряшів свою премію і Матиця словацька – Дом Матицї словацькой у Пряшові. Тов преміёв журї оцїнила Основну школу з матерьсков школов з навчалным языком русиньскым в селї Кленова, котру веде директора Марцела Рунянинова. Якраз дїти із той школы однесли собі дакілько оцїнінь і у своїх катеґоріях і належали меджі найлїпше приготовленых декламаторів.

 

О рік – юбілейно

Духновічів Пряшів з рока на рік тїшыть ся векшій облюбі. Належыть моя вдяка, вдяка ґаранта проєкту, вшыткым, котры і тот рік постарали ся о то, жебы Духновічів Пряшів быв достойным святом русиньского слова – орґанізаторам реґіоналных конкурзів і тым, котры орґанізачно помагали на цїсловацькій переглядцї в Пряшові. Велика вдяка належыть і нашым педаґоґам, котры наперек вшыткому, наперек тому, же навчаня нашого языка на школах іщі все зіставать веце на добровольности, приготовлюють русиньскы дїти і роблять то досправды добрї.

Подяковати ся треба і акторцї Театру Александра Духновіча Міріямі Федорковій, котра тот рік конферовала Духновічів Пряшів, як і Ґабріелї Очкаёвій, акторцї Театру Йонаша Заборьского, котра вєдно із Міріямов Федорков приготовили забавный проґрам про дїти, покля журї оцїнёвала декламаторів. За технічне забезпечіня конкурзу дякуєме робітникам Театру Александра Духновіча, котры ся нам постарали о звук, світло, технічну поміч на сценї.

Духновічів Пряшів бы не міг одбыти ся без того, жебы нас із публічных средств підпорив Фонд на підпору културы народностных меншын. Так само треба подяковати Русиньскій обродї на Словеньску як главному орґанізаторови, котра забезпечіла дарункы про вшыткых, і тых, котры собі діплом домів не однесли, Окресному уряду – одбору школства у Пряшові, котрый конкурз довгодобо фінанчно підтримує і Дому Матицї словацькой в Пряшові.

О рік то буде юбілейне. Духновічів Пряшів буде святковати 20 років. З достойным віком конкурзу уж теперь знаме, же ся знова можеме тїшыти і на достойны выступы русиньскых декламаторів.

 

Петро МЕДВІДЬ