13. 8. 2025: Радник презідента про меншыны Форро стрїтив ся з Міланом Яном Піліпом
„Кажда комуніта має свою історію – і кажда з тых історій є частков історії Словакії,“ написав у віторок, 12-го авґуста 2025-го року, на своїм офіціалнім профілї на сїтї Facebook Крістіан Форро (на фотцї вправо), радник презідента Словацького републікы Петра Пеллеґріні з вопросів народностных меншын.
Зробив так день по стрїчі, котру Форро абсолвав в Презідентьскім палаці з Міланом Яном Піліпом, председом Палаты народностных меншын Рады влады Словацькой републікы про народностны меншыны.
„Бісїдовали сьме о актуалній сітуації народностных комуніт, о вызвах, котры мають перед собов, і о можливостях, як їх рішыти,“ пише далше радник презідента. За ёго словами не обышли ани тему вольбы директора Фонду на підпору културы народностных меншын.
„Платить простый прінціп: О нас не може быти без нас. В демократічнім світї є неприятельным, жебы о людях вырїшовало ся без їх участи і голосу,“ закінчів Форро.
Як інформовав нашу редакцію Мілан Ян Піліп, котрый є членом меншыновой рады за русиньску народностну меншыну, на тій стрїчі ся як новозовленый председа Палаты народностных меншын доїднав із Крістіаном Форро на послїднім засїданю Рады влады Словацькой републікы про народностны меншыны, котре одбыло ся на кінцю юна того року.
Форро, котрого презідент Пеллеґріні выменовав за свого радника про народностны меншыны в місяці май, на засїданю втогды взяв участь.
„Добісїдовали сьме ся втогды, же ся стрїтиме і даякым способом наставиме комунікацію меджі Радов влады, респектівно Палатов народностных меншын, але і межі нашов – русиньсков народностнов меншынов, і Канцеларіёв презідента Словацькой републікы,“ повів Піліп.
„З паном Форро бісїдовали сьме і о можности зорґанізованя даякого округлого стола представителїв народностных меншын і ёго уряду. Пан радник ня інформовав на нашій стрїчі, же уж ся стрїтив, а і далше буде стрїчати ся з представителями окремых меншын. Хоче з меншынами зробити собі контакты, але в урядї є курто.“
Як далше інформовав Мілан Ян Піліп, почас стрїчі радник презідента інтересовав ся Русинами, як і вопросом проблемы Русинів а такзваных „Русинів-Українцїв“, што му председа Палаты народностных меншын пояснив.
Піліп потвердив, же обговорили і пробематіку Фонду на підпору културы народностных меншын, а не бісїдовали лем о недавній вольбі нового директора. В справі вольбы директора Форро хоче почекати на становиско ґенералного прокуратора, кедже до нёго в тім дїлї были загнаны дві поданя. Далше подля Піліпа бісїдовали о общіх проблемах меншыного фонду, котры бы треба было рїшыти векшов новелізаціёв закона.
Піліп вірить, же Крістіан Форро буде і в будучности брати участь на засїданях Рады влады Словацькой републікы про народностны меншыны, а тїснїшы контакты буде утримовати і з русиньсков меншынов.
Корпус радників презідента Словацькой републікы Петра Пеллеґріні розшырив ся о радника про народностны комуніты в маю. Крістіан Форро у тій функції на кінцю юна зорґанізовав округлый стіл, на котрім брали участь представителї народностных меншын і презідент.
Петро МЕДВІДЬ, ЛЕМ.фм, языкова і ґрафічна управа: АРК СР.
