14. 1. 2026: Выстава вытватного уменя Лемків / карпатькых Русинів під назвов Формы притомности

Позываме Вас на вернісаж выставы «Формы притомности. Уменя Лемків / карпатьскых Русинів‟,  котра ся буде 16. януара 2026 року о 18.00 год. в Державнім етноґрафічнім музею у Варшаві.

В експозіції буде представленых понад 200 творів з Польщі, Словакіїі, Сербії, Хорватії, Румунії, Мадярьска, Україны, США, Молдавії і Чех. То перша в історії так шырока презентація умелецькой творчости нашой карпатьской громады. Куратором выставы є Лемко, історик вытвырного уменя і учітель Варшавской універзіты – др. Михал Шымко.
Выстава одкрывать богатство і пестрость творів знамых вытварных умелцїв – Епіфана Дровняка (Никифора), Юрія Новосільского, Енді Варгола – але тыж і творцїв і творкинь, што дотеперь стояли поза головным напрямом вытварной сцены. Експозіція підкреслять, же вытварне уменя Лемків / карпатскых Русинів не є фолклорным чудаком, але жывов, автономнов і розмаїтов частёв европской културы. Важным контекстом выставы суть свідчіня нашого народу: нучены міґрації, асіміляція, траґедія Талергофу і акція «Вісла». Память о тых подіях вертать ся у творах умелцїв, а предметы з лемківскых / русиньскых хыж стають ся жывыма свідками історії і знаками тырваня громады, котра хоць розшмарена по світї, заховала свій язык, ідентіту і память. Експозіція охоплює шырокый ґеоґрафічный простор – од Польщі, Словакії, Мадярьска і Сербії, через Чехы, Румунію, Україну і Хорватію, аж по діаспору в Америцї. В тым контекстї слова Енді Варгола «Єм нивыдкы» принимають нове значіня – односять ся до ідентіты, яка пересягує граніцї. 
Выстава «Формы притомности» перерывать довгорочну тишу і демаскує выключіня, присутне в інстітуційным поглядї на вытварне уменя. Навертаючі голос тым, што їм го десятьрочами было уберано, вказуєме, же дїдовизна Лемків / карпатьскых Русинів ся нелем вертать, але без перервы тырвать – як жывый, актуальный елемент модерной культуры.
Сердечно позываме на верніж выставы і на выставу вобще. 

dr Michał SZYMKO, Państwowe Muzeum Etnograficzne w Warszawie, языкова і ґрафічна управа: АРК СР.