14. 3. 2016: 4-ый річник Фестівалу културы Русинів Словеньска вже має свій датум

4-ый річник Фестівалу културы Русинів Словеньска, котрый у Свіднику орґанізує Окресна орґанізація Русьньской оброды у Свіднику, буде тот рік проходити в днях 23-го аж 29-го мая. Тікеты ся дають купити уж теперь на дакілько продайных місцях в Пряшівскім краю, но так само і через інтернет.

 

Русиньскый фестівал у Свіднику, котрый має підназву Од Русинів про вшыткых знова принесе тыжднёву мултіжандрову проглядку домашніх і загранічных выступаючіх. Допроводны події, котры будуть проходити через тыждень, будуть знова бесплатны і фестівал завершыть ся вікендовым проґрамом на свідницькім амфітеатрї. Култура Русинів буде презентована в подобі театралных пєс, філмовых проєкцій, бісїд, выступлїнь фолклорных ансамблїв і далшых музичных, співацькых і танечных ґруп. Головный проґрам на амфітеатрї буде од пятніцї 27-го мая до недїлї 29-го мая 2016-го року.

Тікеты на вшыткы три днї головного проґраму собі можете через інтернет купити на порталї Tickeportal уж теперь. До 30-го апріля є ціна тікету на три днї лем 3 €. За 5 € буде мож купити тікеты до 22-го мая, потім ся будуть тікеты продавати за 7 €.

 

Як пишуть орґанізаторы на своїм сайтї, єднов із головных думок фестівалу, котрый орґанізують од 2013-го року, є снажіня Русинів вказати, якы досправды суть. Народом приготовленым подїлити ся о своє културне богатство і вєдно з тым народом одкрытым нагодї поучіти ся із традіцій, скушеностей і прямованя народів і култур іншых. І зато є головным одказом взаємна толеранція і решпект, сполупраца і іншпірація міджі Русинами і далшыма етніками, котра має помагати утриманю своїх унікатных традіцій і култур.

П. М.