14. 5. 2018: Папа римскый Франціск прияв метрополіту Ростислава

Глава Католицькой церькви прияла 11-го мая 2018-го року на особистій авдіенції метрополіту Ростислава, першоєрарху Православной церькви в чеськых країнах і на Словакії.

Метрополіту Ростислава при стрїчі з папом Франціском допроводив пердседа Папской рады на підпору єдности хрістіанів кардінал Курт Кох. В делеґації были михалївсько-кошіцькый архієпіскоп Ґеорґій, архієпіскоп пражскый і чеськых країн Михаіл і далшы представителї Православной церькви. Історічно перша стрїча метрополіты Ростислава із папом Франціском надвязує на ёго стрїчу з кардіналом Куртом Кохом почас навщівы председы Папской рады на підпору єдности хрістіанів у Братїславі і Пряшові в октобрї 2017-го року.

Архієпіскоп Ростислав у своїм приговорї повів, же і кедь того часу православны і римскы католици не годны із історічных причін „вєдно ламати Хлїб Жывота“, зіставають учениками, котры „вєдно як путници крачають по дразї і з котрыма, і кедь собі то може даколи не усвідомлюєме, довєдна крачать і наш Господь і Бог, котрый нас потїшать, розкрывать нам Писма, давать нову надію, наповнює одвагов і обновлює нашу довіру.“

Метрополіта так само папови повів: „Днесь ня, Ваша Святость, як єдного із наступників святого Мефодія на престолї моравско-паноньскых архієпіскопів принимате з єднаков радостёв і любвов, з яков св. Мефодія прияв у 868-ім роцї Ваш честованый попередник Гадріан.“ Папа римскый Франціск на приговор архієпіскопа реаґовав словами, же єдность не значіть єднакость, але гармонізацію різнїня у Святім Дусї. Выразив надію, же на молитвы святых Кіріла і Мефодія одбидві церькви єдного дня прийдуть до цїлковой єдности, до котрой поступно прямують.

Обидвоми церьковны представителї оцїнили діяльство Змішаной меджінародной комісії про теолоґічный діалоґ меджі Католицьков церьквов і Православнов церьквов. У тій комісії заступать Православну церьков у чеськых країнах і на Словакії михалївско-кошіцькый архієпіскоп Ґеорґій. Папа повів, же собі желать, жебы тота комісія, котра у 2016-ім роцї выдала документ о односинах меджі папскым пріматом і соборностёв у першім тісячрічу, продовжовала в проглублёваню діалоґу на тоту тему.

В рамках штириднёвого проґраму в Римі служыв метрополіта Ростислав Божественну літурґію коло гробу св. Кіріла в римскій Базиліцї св. Клімента. Вєдно із своёв делеґаціёв навщівив і Базиліку св. Петра, Базиліку св. Павла ці Катакомбы св. Себастіана.

Петро МЕДВІДЬ