14. 8. 2019: 100-роча знамого вытварного умелця Словакії – Ореста Дубая

Орест Дубай (Orest Dubay) нар. ся 15. авґуста 1919 у Великій Полянї, у втогдышнїй Чехословакії, теперь теріторія Словакії, умер 2. октобра 2005 у Братїславі на Словакії. Быв ґрафіком, маляром і высокошкольскым учітелём.

По закінчіню ґімназіалных штудій у Пряшові (1930 – 1936) і Мукачові (1936 – 1939) О. Дубай учів ся в оддїлїню вытварного уменя у Высокій технічній школї в Братїславі (1939 – 1943). Зістав у Братїславі, де ілустровав новинкы, вступив до ґрыпы умелцїв Голлар і Алеш. О. Дубай розвинув свій неповторный ґрафічный штіл, ёго облюбеным жанром были рельєфы малого розміру на дереві, кераміцї і каменї. Меджі ёго композівціями треба спомянути цікл ґрафічных робот „In memoriam Tokajík“ (1949), присвяченый русиньскому селу на выходній Словакії, знищеному фашістіцькыма войсками у 1944 р. Почас 1960-ых років О. Дубай робив у штілї оп-арту. Быв повіреный зробити дакілько декоратівных скулптурных робот про інтерьєры верейных будов на Словакії, у якых він выужывать метал, скло і промысловы матеріалы. Меджі найзнамішы ёго роботы належыть серія пятёх ґобелінів. Тота робота прикрашать принимальну салу замку в Братїславі (1983). Зачінаючі од 1949 р. О. Дубай учіть на Высокій школї вытварных умень в Братїславі (доцент, 1962; професор, 1967), быв єй ректором (1968 – 1971). Быв му удїленый тітут Заслуженый умелець Чехословакії (1969), Народный умелець Чехословакії (1977), став честным членом академії у Флоренції (1964) і Римі (1972).

 

Література:

Іван Мацинський, „65 років Ореста Дубая та сонячний світ його графічної творчості‟, Науковий збірник Музею української куьтури в Свиднику, ХІІ (Братислава – Пряшів, 1985), с. 347-409; Ладислав Пушкаш, „Камерна графіка Ореста Дубая в 1945 – 1985 роках‟, тамже, ХХІІ (2001), с. 358-371.

Іван ПОП, здрой: „Енциклопедія історії та культури карпатських русинів‟ зоставителїв П. Р. Маґочія і І. Попа, (Ужгород: „Видавництво В. Падяка‟, 2010, на с. 198-1999), переклад і звыразнїня писма: А. З.