14. 8. 2024: Нова моноґрафія Елейн Русинко розповідать історію матери Енді Варгола

Выдавательство Піттсбурґской універзіты на новембер 2024-го року приготовлює выданя новой публікації в рамках серії Російскы і выходоевропскы штудії. Авторков є емерітна асоціована професорка на Маріландьскій універзіті в Балтіморі – Елейн Русинко, котра довгодобо занимать ся баданём історії русиньской літературы.

Вже понад десять років Елейн Русинко занимать ся і особов Юлії Вархолы – матери Енді Варгола, штудує вшыткы артефакты з нёв повязаны в архівах Варголового музея в Піттсбурґу, чого выслїдком має быти приготовлёвана моноґрафія з назвов Матірь Енді Варгола. Жена за художником.

„Юліа Вархола сама о собі была художницёв,“ пише ку книжцї Богдан Горбаль, куратор Славяньскых і выходоевропскых збірок Ню Йорьской публічной бібліотекы. „Русинко зручно і чутливо розповідать їй жывотну історію од Миковой через Піттсбурґ аж по Ню Йорк, причім дає вываженый погляд, котрый спохыбнює конвечный портрет.“

Карпаторусиньска саґа

І кедь вже тоты, котры писали біоґрафії Варгола, давно признали, же ёго мати мала вызначный вплив на ёго жывот і уменя, історія Юлії Вархолы дотеперь не была розповіджена, пише ся в анотації приготовлёваной публікації.

„Ниґда не мала можность розвивати свої значны умелецькы таленты. Намісто того робила і жертвовала себе, жебы їй сын годен быв іти за своїма снами, причім помогла формовати уменя і особность Енді Варгола.“

Юлія Вархола наслїдовала свого сына і до Ню Йорку, де з ним жыла майже 20 років і была залучена до ёго особного і художного жывота. Была позната як „матірь Енді Варгола“, а так ся і підписовала на своїх властных рисунках.

„Елейн Русинко приносить саґу карпаторусиньского жывота в першій половинї двадцятого стороча, як в Старім краю, так і в еміґрації, з окремым акцентом насудьбу жен. На основі дотеперь непробаданых архівів і обявлїня новых детайлів приносить новый погляд на приселенцьку скушеность родины Вархоловых, котра формовала Енді Варгола як особность і художника,“ пише Патріція Крафчік із емерітна професорка Еверґріньской державной універзіты.

Дотеперь непублікованый матеріал

Нова моноґрафія Елейн Русинко Матірь Енді Варгола. Жена за художником бадать дотеперь непублікованый матеріал включно по русиньскы писаной корешпондецнії і відеозаписів, і приносить глубокый погляд на тяжыкый жывот Юлії Вархолы.

Русинко слїдує жывот матери краля поп-арту „од народных звычаїв із їй Старого краю через смоґ промыслового Піттсбурґу і ґрявк авантґардного Ню Йорку. Русинко одкрывать вплив Юліїной карпаторусиньской културы, ґрекокатолицького віросповіданя і традічного світопогляду на їй ултрамодерного сына, тіпічного америцького художника. Тото детайлне баданя світа Вархоловой родины уможнює лїпше порозуміня Енді і Юлії, причім єдночасно освітлює шыршы соціалны і културы вопросы, котры їх формовали і овпливнёвали.“

Петро МЕДВІДЬ, ЛЕМ.фм. Ґрафічна і языкова управа: АРК в СР.