15. 1. 2025: Вмер пражскый екзарха Ладислав Гучко
Як інформовав на офіціалнім сайтí Апостольского екзархату Ґрекокатолицькой церькви в Чеській републіцí протосінкел Василь Сливоцькый, дня 14-го януара 2025-го року вмер у шпыталю „На Франтішку“ в Празї по куртій хворотї владыка Ладислав Гучко, пражскый апостольскый екзарха, тітуларьный єпіскоп орейскый.
Владыка Ладислав народив ся 16-го фебруара 1948-го року в Пряшові, в родинї русиньского ґрекокатолицького священика. У 1966-ім роцї приголосив ся на штудії на Кіріло-Мефодійску римокатолицьку богословску факулту в Братїславі.
В тім часї была Ґрекокатолицька церьков у Чехословакії ілеґална, але і римокатолици мали лем єдну поволену семінарію, а державов обмеджены квоты, кілько богословів можуть прияти. Тоты квоты были глубоко під граніцёв реалных потреб Церькви.
Будучого єпіскопа не прияли, і так пішов штудовати експеріменталну фізіку на Природознавчу факулту Універзіты Павла Йозефа Шафарика в Кошїцях, де у 1972-ім роцї обгаїв дізертацію і здобыв дітул доктора природных наук (RNDr.).
З прічіны свого реліґійного пересвідчіня не міг зістати робити на факултї, мусив глядати собі іншу роботу. У 1987-ім роцї здобыв на Высокій школї баньскій в Остраві тітул кандідата ґеолоґічных наук.
Кедь у 1989-ім роцї дішло в Чехословакії ку політічным змінам, дакілько місяцїв робив редактора в ґазетї „Katolícke noviny‟, пак в роках 1990 аж 1991 быв выконным секретарём Конференції єпіскопів Словакії.
У 1992-ім роцї быв посланый до Рима на теолоґічны штудії на Папску Латераньску універзіту, котры закінчів у 2000-ім роцї докторатом. Темов ёго докторьской роботы были козмолоґічны ідеї у російскых реліґійных мыслителїв 19-го і 20-го столїтя.
Рукуположіня на священика прияв 30-го марца 1996-го року з рук втогдышнёго крижевацького єпархы – кір Славоміра Мікловша. Кедь у 2000-ім роцї вернув ся з Рима, зачав учіти доґматічну теолоґію на Теолоґічнім інштітутї в Кошіцях, рік быв і шпіруталом в Священьскій семінарії святого Карола Боромейского в Кошіцях.
Папа римскый Йоан Павел ІІ. Ладислава Гучка 24-го апріля 2003-го року призначів апостольскым екзархом про католиків візантійского обряду в Чеській републіцї, а єдночасно тітуларьным єпіскопом орейскым. У функції вычеряв першого пражского екзарху, владыку Івана Лявинця, котрый вже мав высокый вік.
Єпіскопску хіротонію прияв владыка Ладислав 31-го мая 2003-го року в Празї з рук теперішнёго руськокерестурьского єпархы – кір Ґеорґія Джуджара.
В роцї 2004 на Теолоґічній факултії в Кошіцях габілітовав ся на доцента в области доґматічной теолоґії. В роках 2005 – 2011 быв ґенералный секретарём Чеськой єпіскопской конференції. В Чеській єпіскопскій конференції быв членом Комісії про віроучіня і Комісії про католицьку выхову.
За інформаціями од родины владыкы Ладисава, погріб одбудеть ся в Празї, де собі желав быти похованый. Вічная память, владыко!
Петро МЕДВІДЬ, ЛЕМ.фм, языкова і ґрафічна управа: АРК в СР
