15. 10. 2016: Одышов до вічности першый презідент самостатной Словацькой републікы
Презідента Михала Ковача жытельство Словакії любило і мало у великій почливости, што доказує і фотка сперед Презідентьского палаца у Братїславі.
Честны гостї на панахідї за небогым Михалом Ковачом у Катедралї св. Мартіна у Братїславі 13. октобра 2016: (першый ряд справа) сучасный презідент Чеськой републікы Мілош Земан, бывшый презідент Словакії Рудолф Шустер, бывшый презідент СР Іван Ґашпаровіч із женов Сілвіов, бывшый презідент Чеська Вацлав Клаус із женов Лівіов.
Михал Ковач ся народив 5. авґуста 1930 у селї Любіша, Гуменьского окресу. За професіов быв банкарём, але пізнїше ся запоїв до політічного жывота на Чехословакії, пізнїше Словакії. Аж ся став першым презідентом новоствореной самостатной Словацькой републікы, а в тій функції в нелегкім часї дїяв од 2. марца 1993 до 2. марца 1998 року.
По довгодобых здраворных проблемах бывшый презідент Словацькой републікы – Інж. Михал Ковач, к. н., быв од 30. септембра 2016 госпіталізованый у Шпыталю св. Михала в Братїславі. Быв в умелім спаню і на плюцній вентілації. Вмер 5. октобра 2016 о 19.50 год. наслїдком заставлїня сердця.
До 12. октобра 2016 шырока громада мала можность дати почливость бывшому першому презідентови СР на Братїславскім градї, де были остаткы презідента выставлены вєдно з ёго портретом і честнов вартов.
13. октобра 2016 дополудне кондоловали офіціалны представителї і делеґації: сучасный презідент Андрей Кіска, председа парламенту Андрей Данко, председа влады Роберт Фіцо, експрезіденты СР Іван Ґашпаровіч і Рудолф Шустер ці членове влады СР.
Перед дванадцятов годинов презідентовы остаткы наложыли на лафету канона, котрый тїгало воєньске авто аж до Презідентьского палацу. Почас погробу од 12.00 год. звонили пять минут вшыткы звоны в Братїславі а коло 13.00 год. прозвучало 20 выстрїлів з канонів.
Далша часть святочного погробу ся одбыла в Катедралї св. Мартіна, де панахіду одслужыв братїславскый архієпіскоп Станїслав Зволеньскый, із святочныма приговорами выступили: сучасный презідент Андрей Кіска, Ковачів порадця Павол Демеш і невластный брат Душан Ковач.
Наконець на послїдню путь до вічности одпровадила бывшого презідента на Ондрейскім цінтерю од 16.15 год. лем найблизша родина.
Одыйшов честный і справедливый чоловік, котрый собі здобыв сердця многых людей, бо на їх хосен, як і цїлой републікы, намагав ся зробити вшытко, што было в ёго моци. Вічная ёму память! (аз)
Од редакції: 2. марца 1993 Михал Ковач з Любішы ся став першым презідентом самостатной СР. Як памятку на тот період публікуєме матеріал, котрый занедовго по наступі до функції презідента зробила в ёго роднім селї Любіша Анна Плїшкова і тот матеріал быв опублікованый у Народных новинках, річ. ІІІ, ч. 11, із 17. марца 1993. Думаме собі, же є і днесь актуалный, зато сьме – в контекстї нашых поглядів до ретроспектівы русиньской періодікы – єй вырїшыли опубліковати i на нашій вебовій сторінцї.
