15. 2. 2017: Театер Александра Духновіча рихтує приповідку і Добряньского

Небійся

„Як то скінчіть, кідь ся народить хлопець, котрый не знать, што то бояти ся? Родічі ся боять двараз тілько і осивіють на почеканя. Історія небоязливого героя, котрый ся кличе Небійся, повна співанок, приносить дакус страшливе, но головно веселе путованя, в котрім ся глядать страх. І як то вже на світї ходить, кідь чоловік глядать єдно, часто найде дашто цалком інше, но о то красше. Та подьте помочі Небійсови научіти ся бояти і посмотрити ся, што у світї нашов,“ пишуть творцёве новой приповідковой пєсы в анотації.

Гей, на сцену нашого театру іщі в місцяцї фебруар завітать приповідка Небійся, котра є вольнов обробков мотівів приповідкы Павла Добшіньского. На режію была запрошена Зузана Ґалкова, котра в тій сезонї вже робила з нашым театром пєсу Фараоны, што была перша премєра в сезонї, і котра вєдно із Ребеков Мікушовов приготовила і текст драматізованой приповідкы. Тлумачіня зробив Ярослав Сисак, о сцену і костімы ся постарав Михал Лошонскі а музику до представлїня скомпоновав Віліям Станек. Премєра новой пєсы про дїти буде в пятніцю 24-го фебруара 2017-го року о 17.00 год. на Великій сценї нашого театру.

Вертать ся Добряньскый

Іщі в 2003-ім роцї наштудовав Театер Александра Духновіча пєсу выызначного словацького драматіка Карола Горака під назвов Адолф Івановіч Добряньскый. Тлумачіня той пєсы в тім часї робив драматурґ театру і представлїня Василь Турок-Гетеш, а режійно ся під Добряньского підписав Матуш Ольга, котрый у перед тым сполупрацовав з нашым театром, і тота сполупраца продовжує доднесь.

По тім, што Округлый стіл Русинів Словеньска доїднав ся на ярь 2016-го року, же выголосить юбілейный Рік Адолфа Добряньского, веджіня театру повіло, же їх вкладом до юбілею буде принавернутя той пєсы на сцену в сезонї 2016/2017. Акторы штохвіля зачнуть „опорошати“ вєдно із режісером Ольгом інсенацію о Добряньскім, і на обновлену премєру ся театрална публіка може тїшыти 31-го марца 2017-го року.

Карол Горак в інсценації Адолф Івановіч Добряньскый перевязав людьску історію із сполоченьскым діятельством вызначного будителя Русинів у часах Австро-Угорьской імперії. Пєсу написав як інсценацію о сітуації чоловіка, котрый мав красный жывотный проєкт – свободу славяньскых народів в Угорьску, но условії запричінили, же міцны світа го лем выссали і знеужыли. Якраз суд із Добряньскым у Львові в роцї 1882, в котрім прокуратор про нёго жадав кару смерти, творить централный інсценачный ключ ку Добряньского судьбі.

Петро МЕДВІДЬ