15. 4. 2025: В Сабінові і Ужгородї вдяка проєкту здіґіталізують културны памяткы

Місто Ужгород у сполупраці із Сабіновом зреалізує черезгранічный проєкт, котрый є заміряный на діґіталізацію семох културно-історічных обєктів, інформує о тім аґентура TASR.

Цїлём проєкт є звекшыти свідомость людей і піпдора розвитку турістічного руху в тых двох містах. Проєкт під назвов Heritage3D фінанцованый є із грошей Европской унії в сумі майже 300 000 евр. Аґентуру о тім інформовав проєктовый референт Містьского уряду в Сабінові Павол Молнар.

Діґіталізовати будуть і Ужгородьскый замок

Як повів, выходословацьке місто як головный партнер черегранічного проєкту передложыло кінцём фебруара 2024-го року жадость о дотацію в рамках проґраму Interreg NEXT HUSKROUA, котрый заміряный є на меджіреґіоналну сполупрацу на пригранічній теріторії країн Мадярьско, Словакія, Румунія і Україна. Предметом того проєкту є 3D мапованя, скенованя і фотоґраметрія выбраных обєктів у Сабінові і Ужгородї.

В Сабінові подля Молнара окрем історічного центра, градных мурів вєдно з вежами, містьской дзвоніцї, будуть предметом діґіталізації і сакралны обєкты як Євангелицькый костел, Римокатолицькый костел святого Йоана Крестителя і Римокатолицькый костел Дївы Марії.

„Україньскым партнером проєкту є Здружіня проєктовых манажерів Ядро, котре у співпраці з нефінанчным партнером – Закарпатьскым областным музейом Тіводара Леготьского, комплетно здіґіталізують замок в Ужгороді,“ повів Молнар з тым, же нефінанчным партнером на словацькім боцї є Римокатолицька церьков – парохія в Сабінові.

Даны позбераны посередництвом мапованя, скенованя і фотоґраметрії будуть оброблены і доступны про людей у формі 3D моделів у діґіталній формі, включно фізічного моделу єдного з обкєтів, ці різных маркетінґовых продуктів.

Очекують досяг на турістічный рух

„Реалізаціёв проєкту вызначно досягне ся здокументованя сучасного стану културно-історічного фонду найновішыма неінвазівныма методами збераня даных в розсягу, котрый дотеперь не мож было здобыти,“ повів пріматор Сабінова Михал Репаскый.

Од діґіталізації і архівації даных очекують, же люде будуть мати веце знань о вартости културно-історічных обєктів, очекує ся і позітівный досяг на розвиток турістічного руху в Сабінові і Ужгородї.

Проєкт є напланованый на 12 місяцїв. Цїлковы кельчікы будуть 332 640 евр, причім од Унії дістануть дотацію в сумі 299 376 евр.

Петро МЕДВІДЬ, ЛЕМ.фм, языкова і ґрафічна управа: АРК СР. Фото: tourinform.org.