15. 5. 2024: ПСК потвердив меморандумом сполупрацу із Закарпатьсков областнов радов

Як інформовало Пресове оддїлїня Пряшівского самосправного краю (ПСК), Кієв став 9-го мая 2024-го року місцём підписаня меморандума меджі Пряшівсков жупов і Закарпатьсков областнов радов.

Партнерскы реґіоны меморандумом обовязали ся звышыти кость і зінтензівнити взаємны односины, а приготовлёвати сполочны проєкты про повойнову обнову ці розвиток теріторій. Меморандум пидписав председа Закарпатьской областной рады Роман Сарай і підпредседа Пряшівского самосправного краю Йозеф Канущак.

Єдночасно тым потвердили вступ обидвох реґіонів до приготовлёваного Европского зґрупованя теріторіалной спплупраці SK-UA ЕЗТС.

Меморандум надвязав на договор меджі представителями ПСК і Закарпатьской областной рады з місяця май 2023-го року. Документом втогды узнесли ся створити сполочну платформу – ЕЗТС, котре має окрем іншого принести звышіня якости условій черезгранічной сполупраці в Проґрамі Interreg VI-A NEXT Мадярьско-Словакія-Румунія-Україна, як і в проґрамах Interreg Danube Transnational programme ці Interreg Europe/Central Europe.

Участны договору доїднали ся підтримовати розвиток взаємной сполупраці такой у веце областях од освітнёй через соціалну по еколоґічну. В рамках Европского зґрупованя теріторіалной сполупраці має быти їх першов пріорітов выпрацованя Стратеґії інтеґрованого розвитку черезгранічного реґіону. Стратеґія має служыти як основа про ідентіфікацію потребных актівностей і жрідел їх фінанцованя в словацько-україньскім пригранічу.

Партнеры хотять так само партіціповати на сполочных проєктах, котры мають служыти на обнову лоґістікы, інфраштруктуры, але і драгового а гранічного перепоїня на Закарпатьску область Україны, включно розвитку турістічного руху. Єдночасно ся заміряють на выміну інформацій, знань і скушеностей меджі орґанами містной і реґіоналной самосправы а економічныма ці соціалныма субєктами з обидвох реґіонів.

Словацько-україньска сполупраца рисує ся і в далшых сферах, якыма суть охрана здравя і жывотного оточіня ці розвиток бізнісовых контактів. З боку ПСК актуалнов зістала і далша поміч біженцям а гуманітарна поміч.

Петро МЕДВІДЬ, ЛЕМ.фм, языкова і ґрафічна управа: АРК в СР.