15. 6. 2024: В Мадярьску Русины голосовали у вольбах до меншыновых самосправовань

В неділю, 9-го юна 2024-го року, в Мадярьску вєдно із вольбами до Европского парламенту проходили і комуналны вольбы в селах і містах, а так само і меншыновы вольбы. Народностны меншыны собі в них на новый функчный період выберали представителїв своїх самосправовань.

Русины, як єдна із офіціално узнаных народностных меншын, так само голосовали. Змагали ся меджі собов головно дві кандідачны спискы, лем в Будапештї были і кандідаты Русиньского културного союзу.

Ішло о кандідачны спискы Общества русиньской інтеліґенції імени Антонія Годинкы (ОРІАГ), котре веде голова Світового конґресу Русинів Штефан Лявинець, і Общества Русинів/Рутенів Мадярьска (ОРМ). Общество Русинів/Рутенів Мадярьска потвердило свою домінанцію у вольбах, хоць окремы округы в Будапештї здобыли і Годинковцї.

Вседержавне русиньске самосправованя в руках ОРМ

5102 людей могло брати участь на меншыновых вольбах, в котрых ся выберав новый склад Вседержавного русиньского самосправованя, дві теріоторіалны самосправованя і вшыткы містны самосправованя. О право голосовати приголосило ся 3905 людей.

До волеб членів Вседержавного русиньского самосправованя (ВРС), як найвысшого самосправного орґану, котрый має 15 членів, были приголошены дві кандідачны спискы. Список ОРІАГ вів Штефан Лявинець, і было на нім 14 кандідатів. Список ОРМ вів Віктор Карамернко, котрый і теперь є шефом ВРС, і было на нім 15 кандідатів.

ОРМ здобыло у вольбах 11 мандатів, штири зістали ОРІАГ. Значіть, ОРМ далше буде рядити Вседержавным русиньскым самосправованём, кедьже має комфортну векшыну.

За ОРМ были выбрати на далшый функчный період Віктор Крамаренко, Янош Кожняньскый, Янош Соноцькый, Олґа Сілцер-Ликовіч, Йожеф Мудро, Базіл Мигаль Теленков, Ґабор Варґа, Евелін Скіба, Віктор Ґіріц, Петро Гладинець і Віктор Дулишковіч. За ОРІАГ здобыли мандаты Штефан Лявинець, Андраш Головацькый, Татяна Ерделі і Мигаль Танчинець.

Выберали і дві областны самосправованя

Русины выберали і дві областны самосправованя. В Областнім русиньскім самосправованю Боршодьско-Абовско-Земпліньской жупы з центром в Мішколцї было 7 мандатів. Шість мандатів здобыло Общество Русинів/Рутенів Мадярьска, лем єден мандат здобыло Общество русиньской інтеліґенції імени Антонія Годинкы.

В Будапештї при вольбах членів Столичного русиньского самосправованя то было тісніше. Із семох мандатів 4 здобыло ОРМ, 3 мандаты припали ОРІАГ, але ОРМ має векшыну і там.

Містны самосправованя векшыново в руках ОРМ

В руках Общества Русинів/Рутенів Мадярьска зістала і векшына містных самосправовань, де будь здобыли мандаты лем їх кандідаты, або мають векшыну. Кандідаты Общества русиньской інтеліґенції імени Антонія Годинкы здобыли наприклад Маріяповч, Печ і Кішварду. Вшыткы остатні села і міста має ОРМ.

Векшый успіх мало ОРІАГ в Будапештї, в рамках выборів до самосправовань в окремых раёнах главного міста. Русиньске самосправованя там є у 18-ёх раёнах. Майже у вшыткых раёнах суть резултаты такы, же вшыткы мандаты здобыв єден список. 10 раёнів буде рядити Общество русиньской інтеліґенції імени Антонія Годинкы, 5 раёнів здобыло Обществo Русинів/Рутенів Мадярьска, а три раёны будуть в руках Русиньского културного союзу.

Натеперь іщі самоспоравованя будуть фунґовати в старім складї, новы мандаты зачнуть платити в осени.

Петро МЕДВІДЬ, ЛЕМ.фм, языкова і ґрафічна управа: АРК в СР.