15. 8. 2018: Стрїча родаків із Руськой Воловой і Кленовой в сканзенї

Вігорлатьскый музей в Гуменнім орґанізує 19-го авґуста 2018-го року подію в рамках проєкту Родаци в сканзені під назвов Руська Волова і Кленова в сканзені. На подію, котра зачне о другій пополідне, музей позывать нелем родаків тых двох сел, но і вшыткых любителїв історії, фолкору ці традічных народных ремесел.

Як інформовала Яна Федічова із Вігорлатьского музею, інштітуція ся в Европскім роцї култорной дїдовизны тов подіёв залучать ку думцї передаваня културной дїдовизны і чувства приналежности в сполочнім европскім просторї.

 

Зачаток в каштелю

Недїлня подія в рамках проєкту ожывленого музею в ціклї стрїч родаків і жытелїв сел, котрых автентічны обєкты стали елементами Експозіції народной архітектуры і бываня (сканзену) зачне переглядков експозіцій музею в будові ренесанчного каштелю в центрї Гуменного. В ареалї сканзену буде проґрам продовжовати од 15.30 год. православнов літурґіёв у Церькви св. Михаіла Архістратига, по чім буде слїдовати переглядка сказену і културный проґрам. В рамках нёго буде мож відїти фолклорны выступлїня і вказованя народных ремесел.

 

Вже традічна подія

Стрїча родаків і жытелїв сел в сканзенї, як інформовала Федічова, належыть вже ку традічным лїтнїм подіям музею. Вдяка тому, же в сканзенї находять ся автентічны будовы із сел, подія і атмосфера сканзену споює родаків і творить простор про укрїплїня локалной приналежности.

Тогорічна подія одказує на богату історію сел бывшых Вовчіх гір – Руськой Воловой і Кленовой, што суть русиньскы села в окресї Снина. Їх сполочну минулость творили і судьбы членів знамой збійницькой ґрупы Федора Головатого. Сам вожатай той ґрупы – Головатый, походив із Руськой Воловой. Членове ёого ґрупы зясь зо сел околіцї. Ґрупа прославила ся перед 525-ма роками писмом, в котрім выгрожовали ся бардеёвскым міщанам.

В сакнзенї гуменьского музею із Руськой Воловой находить ся традічный сыпанець перекрытый шындлёвов стрїхов. Кленова має в сканзенї веце як сторічный сільскый дім.

П. М.