15. 9. 2025: Меджілабірцї обновили войновый цінтерь у Выдрани

Місто Меджілавбірцї зреконштруовало войновый цінтерь із Першой світовой войны в містьскій части Выдрань. Як про аґентуру TASR повіла Марія Яночкова з Містьского уряду в Меджілабірцях, цінтерь ся у Выдрани не обновлёвав уж дакілько декад.

Святочне посвячіня із панахідов за павшых вояків одбыло ся в четверь, 11-го септембра 2025-го року.

Реконштрукція обсяговала веце робот. Обновив ся ходник, ревіталізація цінтеря, якый має 480 квадратных метрів, обсяговала і оновлїня плота, высаджіня зелени, іншталацію деревяных крестів на вызначены гробы і выбудованя централного памятника у вышнїй части ареалу.

Цїлковы кошты на проєкт під назвов Слїдами Першой світовой войны в польско-словацькім пригранічу были в сумі скоро 45 тісяч евр, причім місто Меджілабірцї здобыло з европскых фондів понад 35 тісяч евр. Проєкт быв робленый в рамках проґраму Interreg Польща – Словакія 2021 – 2027, і партнером з другого боку граніцї была Ґміна Команьча. В Команьчі в рамках того проєкту зробила ся Ізба памяти, котра была святочно одкрыта в тот самый день.

В окресї Меджілабірцї находить ся 40 войновых цінтерів, в котрых є похованых приблизно 17,5 тісяч вояків із періоду Першой світовой войны. Лем на теріторії міста є шість такых цінтерів.

„Віриме, же ся нам поступно подарить схосновати потенціал темы Першой світовой войны і войновы памяткы в містї не будуть лем пєтныма місцями, але і памятками, котры заінтересують турістів і подорожных. Парадоксно так траґічны войновы дїї, котры пошкодили місто, можуть му по веце як сто роках значно помочі,“ повіла про аґентуру Яночкова.

Петро МЕДВІДЬ, ЛЕМ.фм, языкова і ґрафічна управа: АРК СР.