16. 11. 2016: У Театрї А. Духновіча одпремєрують пєсу Бісы
Як є звыком каждорічно, в децембрї Театер Александра Духновіча принесе на сцену свою другу премєру в сезонї. Премєра то в театрїі буде і режісерьска, бо Бісы режірує Браніслав Мазух, котрый першыраз сполупрацує з нашым професіоналным театром.
На 16-го децембра 2016 є напланована премєра пєсы, котра выникла на мотівы твору єдного із найвызначнїшых російскых літературных класіків. Театер тот раз принесе на професіоналну сцену Фёдора Достоєвского і ёго Бісы. Бісы належать міджі Достоєвского остатнї два великы творы, котры написав при кінцю свого жывота. По політічнім романї Бісы, котрый говорить о зничуючій силї анархізму і нігілізму, в котрім антіціпує приход соціалізму і ёго дослідкы, Достоєвскый написав вже лем Братів Карамазовых.
Режіровати в Театрї Александра Духновіча дістав по першый раз можность Браніслав Мазух. Родак із Новых Замків діє в Чехії. Там закінчів і режію і драматурґію на Катедрї алтернатівного і бабкового театру Театралной факулты Академії музичных умень в Празї. Мазух сполупрацвує з чеськыма і польскыма театрами.
„Демоны вышли з чоловіка і вошли до свинь. Цїле стадо ся верьгло з берега до озера і затопило ся… А народ ішов посмотрити, што ся стало. Пришли к Ісусови і нашли чоловіка, з котрого вышли демоны. Він сидїв коло Ісусовых ніг облеченый і здравого розуму. І острашыли ся,“ цїтують творцёве пєсы Євангеліє од святого Лукы.
Бісы суть припадовов штудіов бунту молодых – тайного общества анархістів, котры в малім провінчнім царьскім містечку выкличуть при пробі о сполоченьскый переворот кырвавы непокої. „Позерателї стануть свідками повіданя о тім обществі і сторгуючой сценічной аналізы доднесь жывых еханізмів насилного боя о зміну режіму, котрый родить ся із фрустрації цїлой ґенерації,“ пише ся ку приготовлёваній пєсї.
Словакія, як і цїіла Европа, в сучасности находить ся в складній сітуації. Різны крізы, потілічна нестабілность, соціална нерівность, неістота – безрадность і страх напомагають тым, котры просаджують просты, но часто дештруктівны рїшіня.
„Достоєвскый в романї Бісы, із котрого выходить драматізація, візіонарьскы пророковав ужасы російскых револуцій і епохы сталінізму. Маєме надію, же ёго візії ся нас і нашой епохы вже не дотуляють, і же не пророкують і нашу властну близку будучность,“ оголошують творцї новой інсценації.
Премєра буде, як сьме уж спомянули, 16-го децембра 2016 о 19.00 год. на Великій сценї Театру Александра Духновіча в Пряшові. День перед тым, 15-го децембра, буде мож відїти Бісы в предпремєрї.
Петро Медвідь
