16. 12. 2016: Председа ПСК оцїнив Моніку Кандрачову

  • Моніка Кандрачова

    Моніка Кандрачова

  • Марія Мачошкова

    Марія Мачошкова

  • Юрій Кресила

    Юрій Кресила

У 20-го децембра 2016 року в Театрї Йонаша Заборьского в Пряшові проходило святочне передаваня Цїн Пряшівского самосправного краю і Цїн председы Пряшівского самосправного краю. Оцїнена была і Моніка Кандрачова, русиньска співачка народныых співанок, котра пропаґує окрем русиньского і шарішскый, спішскый ці земпліньскый фолклор.

Цїны ПСК

Лавреатами Цїны Пряшівского самосправного краю того року стали ся оліміопніци з Ріо де Жанеро Ладїслав і Петер Шкантаровы і паралімпіонік Самуел Андрейчік. Оцїнїня здобыла і Ґрекокатолицька харіта в Пряшові за повзбуджованя віры, довгорічну анґажовану поміч людям в бідї з нагоды 25-го юбілею їй заснованя.

 

Оцїнёвав і жупан

 

Председа Пряшівского самосправного краю Петер Худік того року своёв преміов оцїнив бывшого ректора Пряшівской універзіты і теперішнього декана Рене Матловіча, пряшівску компанію 4 SPORT і русиньску народну співачку Моніку Кандрачову.

 

Выняткове оцїнїня пряшівскый жупан удїлив Волоґодьскій области. Тот загранічный партнерскый реґіон із Російской федерації здобыв нагороду за довгодобы приятельскы односины і сполупрацу при розвитку реґіонів і містных самосправовань.

 

Моніка Кандрачова

 

Русиньска народна співачка Моніка Кандрачова ся народила 26-го януара 1956-го року в селї Дячів, окрес Сабінів у родинї Яна і Марії Канющаковых. Мама была з дому Штельбаска, так ся называло і русиньске село Штельбах, днесь Тихый Потік, зато предків мож глядати і там. Їй уйко Канющак по войнї довгы рокы учітелёвав у русиньскім селї Нижнї Репашы.

 

Зо співом зачала уж на основній школї. Перше оцїнїня здобыла як дванадцятьрічна на цїлословацькім конкурзї в Пряшові. Штудовала на еконімічній школї в Сабінові. В тім часї брала участь на цїлодржаавнім конкурзї Мелодії приятельства і репрезентовала реґіоналный фолклор в Петербурзї, і в Москві. Увагу на ню звернув редактор братїславского штудія Словацького радіа Ондрей Демо, знамый фолклоріста, і запросив єй на награваня до Братїславы. Так зачала довгодоба і успішна сполупраца з державным радіом. Записы Кандрачовой были выбраты і до міджінародной конкурзной переглядкы радіовых записів Prix musique folklorique de Radio Bratislava в катеґорії автентічного фолклору.

 

Іщі за штудентьскых часів брала много раз участь і на Маковіцькій струнї, што была в тім часі єдина конкурзна переглядка русиньской і україньской співанкы в Чехословакії. Но у своїй карьєрї выступала на многых фестівалах дома і за граніцями, ці на властных концертах. Моніку Кандрачову мож знати із мнногых телевізных проґрамів, а головно з многых албумів, котры выдала, і на котрых співать фолклор, но і паралітурґічны співанкы.

 

Найзнамішы авдіоказеты і ЦД албумы вышли під назвами: Dze ši, sosničko, rosla (1991); O, Marije, Maty Boža (1993); Narodil sa Kristus v Betlehéme (1993), V Nazareti zacvila lelija (1994); Christos voskrese (1994); Na Ľevockej hure dzvon še oziva (1995); V Betlehéme novina (1995); Christos prostredi nas (1996);  A čija to chyža (2004); Sinu muj, sinu muj (2005); Oj zabava (2009); Najkrajšie koledy (2010); Spievajme Mаrii (2011); Anjelským pozdravením (2011), Spev je môj život (2012); Moje naj (2013).

 

Окрем того сполупрацовала наприклад і на авдіозаписах зо Словацькым народным умелецькым колектівом (Slovenský ľudový umelecký koletív) ітд.

На своїй пути зо співанков познакомила ся із Міланом Кандрачом, молодым учітелём, співаком, музикантом і великым фолклорістом, котрый єй пізнїше як їй муж допроводив на акордеонї. З ним має і двох сынів – Андрія, так само знамого фолклорісту, котрый має днесь властну народну музику Кандрачовцї а робив і в русиньскім высыланю Радіа Патрія, і молодшого Мілана, котрый науково присвячать ся візантійскій літурґічній музицї.

 

Оцїнены уж были і іншы Русины

 

Оцїнїня Пряшівского самосправного краю і председы Пряшівского самосправного краю ся удїлюють од року 2004. За тот час было уж оцїненых і дакілько Русинів. Русиньскыма лавреатами были Його блаженость Николай, православный архієпіскоп, співачкы Марія Мачошкова і Анна Сервіцька, малярї Юрій Кресила і Андрій Смоляк і доктор-ортопед Ян Клёц.

 

Петро МЕДВІДЬ

 

Script logo