16. 2. 2019: Мурянка нагородженый Премійом ім. Антония Годинкы

  • Оцїненый Петро Трохановскый-Мурянкы (справа) при Памятнику Антонія Годинкы з председом Світового конґресу Русинів Др. Штефанов Лявинцём, котрый Петрови офіціално передав Премію Антонія Годинкы.

    Оцїненый Петро Трохановскый-Мурянкы (справа) при Памятнику Антонія Годинкы з председом Світового конґресу Русинів Др. Штефанов Лявинцём, котрый Петрови офіціално передав Премію Антонія Годинкы.

В днях од 8. до 9. лютого/фебруара 2019 рока на Мадярах, в столичным місті Будапешт, Русины святкували Дни Памяти Антония Годинкы. В тым році выріжненый і нагородженый остал медже інчыма лемківскій поета, писатель, тлумач та вызначный діяч – Петро Трохановскій-Мурянка.

Того рока проходит 155. річниця од дня народжыня Антония Годинкы, вызначного історика, русиньского выкладовці Мадярской Академіі Наук, ректора Печского Університету та честного предсідателя Підкарпатского Общества Наук. В рамках річницьовых святкувань, вручана была Премія Антония Годинкы, котру за вызначну діяльніст в обшыри розвитку русиньского языка і літературы признано Петрови Трохановскому. Друга же трафила до рук директора Наукового Лінґвістичного Центра ім. А. Годинкы, проф. др Іштвана Чернічко.

Нагороды вручано вчас конференциі, яка проходила 8 лютого/фебруара і зачала ся о 16.00 год. офіциялным одкрытьом. На зачатку, вступне слово выголосил др. Штефан Лявинец, предсідатель Вседержавного Общества Русиньской Інтеліґенциі ім. Антония Годинкы (ВОРІАГ). Дальше, др. Янош Сабов, заступця предсідателя той орґанізациі, континуувал рефератом на чест памяти проф. др Антония Лявинця, першого предсідателя ВОРІАГ. Пак, нагороджано лавреатів Преміі Антония Годинкы. Нагороду вручал Ведучый Світовой Рады Русинів, др. Штефан Лявинец. Слідуючо, з прелекцийом про русинькій язык в Кыйові выступил проф. др Іштван Чернічко, директор Науково-Дослідничого Лінґвістичного Центра ім. Антония Годинкы. Было тіж про дослідничо-наукову діяльніст лінґівстичного центра та про 10. річницю смерти Андраша Штумпфа-Бенедека, писателя, поеты, літературознавці. Дальше, был час на дискуцию. На конец, слово поздровліня выголосил активіста Вседержавного Общества Русиньской Інтеліґенциі ім. Антония Годинкы, Йожеф Балог. Конференцию закінчено презентацийом книгы др. Йожефа Ботліка.

О ден, 9 лютого/фебруара, о 11.00 год., Петро Мурянка з женом та Ведучым Світовой Рады Русинів, др. Штефаном Лявинцьом, одвиділи цмонтір, на котрым спочыват Антоний Годинка.

Подія орґанізувана была Вседржавным Русиньскым Самоурядом на Мадярах.

Наталия КЛИНКОВСКА, Лем.фм

(Публікуєме в оріґіналї – мадярьскім варіантї русиньского языка.)

Script logo